“La racuelte Glagns di discors e je nassude, come Cjantis e rimarolis (1987) de necessitât di furnî il program di educazion bilengâl (furlan-talian) di materiâi didatics par furlan che a poiassin parsore di almancul trê sieltis di fonde: inmagjinâ imprescj (…); insuazâ lis ativitâts dentri di un telâr (…); verificâ il valôr de plui part des propuestis, sperimentantlis insiemi cu lis mestris e cui fruts”.
◆ AlAl è un libri di 85 pagjinis (cm. 22 par 11,5) pensât par compagnâ il percors di formazion bilengâl dai frutins intes scuelutis di Trep e di Gjian di Cividât intai agns dal 1986 al 1989. Il progjet al jere elaborât di une équipe pedagogjiche formade di Nereo Perini, Zuan Frau e Silvane Schiavi Fachin, nons che no àn dibisugne di coments. Lis notis didatichis a divegnin di studis specifics su lis modalitâts di aprendiment in etât di infanzie. Plui che insegnâ, si trate di movi la curiositât dal frut a interpretâ, par esempli, i rumôrs che al sint, a metiju in ordin intal spazi (sot/parsore; devant/daûr) e intal timp (prime/daspò; za timp/doman). Dutis lis ativitâts si presentin in maniere vivarose in graciis des contis de none Margherite e des baronadis dal nevôt Jacumin; dai dissens di Altan; dai zûcs; dai sugjeriments pes costruzions di bebeis o par fâ di mangjâ. No mancjin i côrs des bestiis, i nemâi de preistorie, la copasse, l’orcolat e v.i. Insome, lis mestris a vevin culì dentri une piçule miniere di materiâi par menâ a bon il progjet che si poiave suntune considerazion une vore semplice: un çurviel bilengâl al funzione miôr di un çurviel cuntune lenghe sole. E in Friûl o vin a disposizion cheste ricjece sore nuie e, par masse timp, le vin butade vie a stupit vie!
Il libri al è insiorât di une cassete cu la regjistrazion dai tescj e cun musichis di compagnament.
A son passâts plui di trente agns de jessude di chest imprest didatic e al sarès une vore biel sintî ce che a pensin in dì di vuê i frutins di in chê volte (che aromai a saran paris e maris ancje lôr) di cheste lôr esperience intant de scuele de infanzie, ce che ur à lassât inte lôr formazion di oms, di feminis e di citadin(i)s. ❚
