Al inizi a jerin in 12, in curt a saran 80: la situazion des adesions ae Comunitât

Al inizi a jerin in dodis, po a son deventâts sedis: i sindics dal Laboratori di Autonomie che un an e mieç indaûr a àn scomençât a resonâ di cemût difindi autoguvier e specialitât a son stâts bogns in 18 mês di presentâ une propueste ae Regjon inte suaze de gnove leç di riforme dai ents locâi, di fâle aprovâ e di slargjâ la lôr rêt a un numar une vore penç di Comuns.
CUMÒ A SON 72_ Ae scree de Assemblee ai 15 di Lui in Cjistiel a Udin a jerin 55 chei che a vevin deliberât la adesion: cumò a son 72. Ma Navarria, come ducj i “operatîfs”, nol à voie di fermâsi achì e al sta cirint di cjapâ dentri ancjemò altris aministrazions. “Nus covente ancjemò un pôc di timp par jessi dal dut operatîfs: o stin spietant di completâ lis adesions e di integrâ la nomine di president e vice cuntun diretîf di int motivade e rapresentative di dut il teritori. Jo o soi de Basse (sindic di Cjarlins, ndr), il gno vice Gerometta al è di Vît, di là da la aghe: al sarès biel che il diretîf si completàs cun rapresentants de Cjargne, dal Gurizan e dal Friûl di Mieç. Il Friûl al podarès cussì pardabon fâ pesâ i siei interès ad implen, de mont ae plane”.
CJARGNE INDAÛR_ La mont par cumò e je un pôc l’anel plui debil de rapresentance: i Comuns cjargnei no àn ancjemò aderît, forsit parcè che impegnâts inte elaborazion dal Statût de plui grande Union Intercomunâl di dut il Friûl. E nol à aderît nancje il Comun di Pordenon, che dopo vê fat capi di jessi disponibil al à specificât che “la zonte no je interessade”. Pecjât, parcè che a Udin e a Gurize no si son fats problemis: e anzi tal Friûl dal Lusinç a son rapresentâts cuasi ducj i Comuns.
IL PROBLEME DAL RICORS_ “O crôt che o rivarìn a 80 Comuns in curt”, al siere Navarria, “parcè che dîs comuns si son impegnâts a votâ la adesion tes setemanis che a vegnin. Ma il numar al podarès cressi une vore se a jentrassin ducj chei Comuns che a àn fat ricors cuintri de Leç di riforme dai ents locâi”. Une cincuantine: e tancj di lôr a saressin interessâts, ma i avocats ur àn fat capî che aderî al vûl dî discognossi il ricors. Cun lôr si rivarès ae maiorance dai 175 Comuns furlanofons. “E prin o dopo, je fasarìn”. ❚
✒ W.T.