AL CINE CUN BETE. Rain Man

Tomâs Cruise, un zovin vendidôr di machinis che al vîf a Triest di cuant che al jere piçul, al discuvierç che il pari al è muart, lassant une grande ereditât, ma no a lui.
Tomâs al discuvierç ancje di vê un fradi, Raimont, che no si ricuardave di vêlu mai viodût, e che al sta intune cliniche par malâts di autisim. E il pari al à lassât dut a lui.
Tomâs, che al veve spindût ducj i bêçs par cjoli une barcje dome par partecipâ ae Barcolane, al decît alore di puartâ vie Raimont de cliniche, par cirî di cjapâsi lui dute la ereditât.
In viaç, Tomâs al scomence a cognossi so fradi: la sô malatie lu à fat deventâ metodic in maniere spropositade, plui furlan di ducj i furlans: Raimont al à di mangjâ simpri lis stessis robis tai stes dîs,  al va in confusion se tu i dâs il spritz tal cjaliç invezit che tal got normâl, al à bisugne di bagnâ l’ort dutis lis seris in Istât (chê robe chi no parcè che al è autistic, ma parcè che al è furlan).
Ma l’autisim (insiemi ae furlanetât) al à dât a Raimont ancje cualchi podê scuasit sorenaturâl:
– la capacitât di lei i volantins dal supermarcjât e calcolâ, a cjâf, dulà che al è miôr fâ la spese (va ben, chê robe chi no è sorenaturâl: le faseve ancje mê none),
– la capacitât di previodi trope farine di polente che e vignarà fûr di un cjamp di blave,
– la memorie di ducj i goi di Zico, cul minût di esecuzion,
– la capacitât di contâ i fros dentri di un pignarûl
– e (simpri fevelant di pignarûi) la capacitât di savê il moment just cuant che il vin brulè si pues bevi cence brusâsi la lenghe, ma no si è ancjemò disfredât.
Tomâs si domande cemût disfrutâ chestis capacitâts; al puarte Raimont a un torneu di briscule tal bar de place. Raimont al rive a contâ dutis lis cjartis e al capìs subite cui che al à briscule e cui no. Nol rive a vinci dut dome parcè che Tomâs al sconfont i tics che al à Raimont te muse cui mots di briscule.
Alore Tomâs al prove a puartâ Raimont tal casinò a Nova Gorica par vuadagnâ alc di plui penç, ma Tomâs al va in confusion e al scomence a vosâ e a fâ il mat a pene passât il Lusinç.
In sumis, ae fin  de storie, Tomâs al scomence a discuvierzi la sô furlanetât, reprimude di tancj agns a Triest, e a volê ben a so fradi. Cumò no i free plui de ereditât: al puarte indaûr Tomâs te cliniche (dulà che al sta miôr, parcè che tal armâr al à dutis lis sôs maiutis, dutis compagnis, cu la scrite “Make frico, not war”) e al scomence a lâ simpri a cjatâlu.
“Sì, biel il film, ma parcè si clamie Rain Man / Om de ploie?”, si domandin ducj ae fin dal film.
Par contâle dute, te prime senegjature il non de pelicule al jere “Sun Man / Om dal soreli”.
Dopo a àn decidût di ambientâle in Friûl. ❚
Bete di Spere