Sfuei Mensîl Furlan Indipendent
Archivi de Patrie

AL CINE CUN BETE. Furlanic

Bete di Spere

Ducj pronts? Compradis lis sioris? Sentâts te poltronute? Al sta par scomençâ Furlanic, o ben, il kolossal Titanic come che al sarès stât se lu ves senegjiât un furlan.
An 1912. Il grant transatlantic Furlanic al sta par partî dal puart di Triest par lâ in Americhe. Parsore, Rosine, une fantate de “Udin ben”, e Jacum, un contadin puar che  si è comprât il biliet cun doi cuintâi di blave di Mortean che al veve cjapât sù lui.
Rosine e je imprometude a Ucio, un fantat di Triest plen di bêçs (par vie di une ereditât, no sigûr parcè che al lave a vore), ma jê e Ucio no àn masse argoments in comun.
Rosine e fevele dal Udin e lui al rispuint cu la Triestine; Rosine e prepare il frico e lui al domande un plat di jote; Rosine e va a vore e lui a pompâ petorâi in palestre.
Dut câs, il Furlanic al partìs, e la prime sere Rosine, stufe di sintî fevelâ Ucio che si svante dai siei risultâts te ultime Barcolane, e scjampe fûr dal salon e e va a fâsi un zîr te tierce classe, dulà che Jacum al stave mangjant polente e frico.
Devant di un tai di ros, Jacum i conte a Rosine de sô ultime vendeme e i doi  si inamorin. Sintût che Jacum al è ancje un pitôr, Rosine lu invide te sô cabine e si met crote par fâsi fâ un ritrat ma Jacum, viodût che un mûr de cabine al è un pôc ruvinât, al cjape il pinel e al scomence a piturâ chel, par comedâlu (par no fâlu passâ par mone, o specifichìn che, dopo finît di piturâ, Jacum si dediche ancje a fâ ducj i “lavôrs” dal câs cun Rosine).
Un famei di Ucio, però, al discuvierç la storie di Jacum e Rosine, cussì Ucio, che al cognòs ben ducj i proprietaris dal Furlanic, lu fâs arestâ des vuardiis.
Intant, però, il cjapitani de nâf, un triestin che in chel moment al jere daûr a polsâ, no si inacuarç che il Furlanic al sta lant intor di un iceberg.
Bum! Il Furlanic al va a sbati e al scomence a tirâ dentri aghe (a dispiet dal non, lu veve fat un triestin).
Ducj a corin a cjapâ une sialupe, ma no ‘nd è par ducj. Ucio al tire fûr un grum di bêçs e si compre un puest te prime che e partìs: “La vuidi jo!”, al dîs, “O ai fat cuatri Barcolanis!”. Ma stant che cuant che al faseve la Barcolane Ucio al paiave un skipper professionist, nol è bon di vuidâ une barcje, e la so sialupe e va jù tal mâr.
Rosine, invezit, e jere lade a liberâ Jacum, peât di une vuardie dentri di une cabine. Cuant che i doi a rivin a vignî fûr, no son plui sialupis, ma Jacum no si rint: al cjape sù doi lens des puartis des cabinis e cuntun martiel e cuatri clauts al fâs sù une barcjute par lui e par Rosine.
L’Artic al è frêt, ma Jacum e Rosine, come ducj i furlans, a vevin metude la maiute sot, duncje a rivin san e salfs in Americhe, dulà che e vierzin un ristorant di broade e muset.
FIN ❚
✒ Bete di Spere

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +