AI 32 DI MAI. Un emigrât in Francie che al à fat fortune

I furlans, si sa, a son simpri stâts un popul di emigrants, usâts a lâ vie a cirî fortune di cualchi altre bande. Ma la fortune, lu savìn, no si cjate mai subit, cussì, tal principi, il furlan al emigre tun puest puar, une cjasute piçule tun borc periferic, contentantsi di un lavôr cualsisedi, il prin che al cjate. Se la fortune e rive masse adore, il furlan si insuspietìs: fortune a un furlan? Impussibil!
Naturalmentri no à di jessi par fuarce simpri cussì, e propite tai ultins timps un furlan al è rivât a emigrâ cjatant un puest tal centri di Parîs, dongje dal Teatri de Opare. Al è un furlan puar, di chei di une volte, epûr al à cjatât un puest tun famôs ristorant.
Puarin, cuissà ce figuris, o starês pensant voaltris: nol savarà nancje meti jù i pirons e i curtìs in ordin. Ma chel, par lui, nol è un probleme, parcè che il so lavôr nol è chel di fâ il camarîr, ma chel di fâ il plat. Il nestri emigrant fortunât, di fat, nol è un furlan di cjar e vues, ma di patatis e formadi: il frico.
A contin i gjornâi che Gerard Depardieu, vignût a fâ di testimonial pe nestre regjon al Vinitaly, al vedi cercjât il frico e nol vedi capît plui nuie: masse bon. Cussì, il frico al è jentrât tal menù dal so ristorant di Parîs. E no je finide: a Depardieu i je vignude ancje voie di plantâ cualchi vignâl de nestris bandis. Cui varessial mai dite? Ta la tiere dai chef, dal champagne e da la vuide Michelin, cualchidun al preferis mangjâ e bevi furlan. La ultime volte che o vin vût une sodisfazion dal gjenar cu la Francie, nus jere a pene rivade une coçonade ta la panze de bande di un di lôr.
Brâf frico: al è simpri biel savê che un furlan al fâs strade. E o soi sigure che no si fermarà li. Cuant che tu âs un amì famôs, la strade e devente dute di rive in jù. No stin a dismenteâsi che prime di jessi un ristoradôr, Depardieu al è un grant atôr e un produtôr. Forsit al discuvierzarà che il frico nol è bon dome di mangjâ, ma ancje di recitâ. Se Depardieu lu puartàs sul set, forsit il frico al podarès reinterpretâ cualchi classic, come «Pan, amôr, patatis e fantasie», o «I oms lu preferissin cu la civole».
O ben, jessint furlan, e duncje cuntun voli simpri tacât tal tacuin, dedicâsi a films mancul di autôr, ma plui di boteghin. Sigûr al sarès miôr par ducj: vonde cu la mode dai «cinepanetons», di cumò indevant o larai a viodi dome i «cinebroadeemuset».
BETE DI SPERE