AI 32 DI MAI – Scuvierzìn la faune furlane: i schiadôrs

La nêf in Friûl e je un spetacul par cui che i plâs la mont, ma e je ancje une ocasion pai sienziâts che a vuelin studiâ di dongje lis dôs speciis principâls de nestre faune di mont: il schiadôr furlan e il schiadôr triestin.
A une prime cjalade, i doi schiadôrs a samearessin doi esemplârs de stesse famee: ducj i doi a son dotâts di çatis lungjis e a ponte, clamadis ancje schîs, e cuvierts cuntun strât colorât plen di plumis. Ma studiant di plui dongje, al devente clâr che o stin fevelant di doi animâi difarents.
Scomençant des difarencis morfologjichis, si note dal moment une diviersitât fondamentâl te cualitât dal mantel (che in chestis dôs speciis al cjape il non sientific di «tute di schi»). Il schiadôr triestin al subìs scuasit ogni an une sorte di mute che i fâs gambiâ la tute di schi cuntune plui di mode. Ancje lis çatis a pierdin lis dôs zontis vecjis par fâ cressi al lôr puest un pâr plui fuart e plui svelt (e di un colôr che al sta ben cu la gnove tute di schi). Il schiadôr furlan, invezit, al samee mancul puartât aes mutazions, e al va indevant par agns e agns cul stes mantel e lis stessis zontis tes çatis. L’an che i sienziâts a àn osservât pe prime volte la variazion gjenetiche denominade «schi carving», par fâ un esempli, ducj i esemplârs di schiadôr triestin a manifestavin bielzà la gnove carateristiche. Par cuintri, il schiadôr furlan al à adotade un pôc par volte tai agns dopo. Dut câs, secont i studiôs, lis mutazions dal schiadôr triestin no son impuartantis pe conservazion e pe evoluzion de specie, ma a coventin soredut par fâ bote sui esemplârs di chel altri ses: la schiadore triestine, che dispès no schie par nuie, ma e sta distirade tal soreli (probabilmentri e je un animâl a  sanc frêt).
Lis dôs speciis a sielzin par vivi doi habitats difarents: il schiadôr furlan al va jù gjoldintsi lis pleis des pistis plui cuietis, il triestin al va jù come un ton pes pistis neris, plui par fâsi viodi (probabilmentri simpri par fins riprodutîfs) che par plasê. Nome par proviodi al sostentament, i doi animâi si cjatin a cjace tal stes lûc: la malghe parsore de piste.
Ma a son soredut i doi viers a segnâ la difarence jenfri i doi schiadôrs, e no nome pai acents, ma ancje pes peraulis. Il lessic dal schiadôr triestin al comprent di fat tiermins come «St. Moritz», «Cortina» e «Chamonix». Tiermins che i studiôs no rivin a capî a ce che a coventin, parcè che i schiadôr triestins a continuin simpri a vignî sul Çoncolan. Misteris de zoologjie.
BETE DI SPERE