AGRICOLTURE. Lis pomolutis di bosc a fasin fieste a “Vasinas”

Vasinis, frazion dal comun di Trasaghis, e sta proprit in chê zone che no je plui la aree di Glemone e no je ancjemò Cjargne: la frazion di Vasinis e je deventade une vore famose pes sôs pomis di bosc, che a cressin spontaniis sù pes monts parsore il paîs, tant che al è stât nomenât “Il Paîs de frambue e de cernicule”. Une volte, di sigûr plui di cumò, a jerin pardabon tancj chei che a vignivin sù ancje di lontan par cjapâ sù frambuis e cerniculis, parcè che cheste ativitât e jere une maniere par vuadagnâ e vê un redit ancje piçul. Si sa che intal 1871 e par cuasi un secul, la frambue e à fat la fortune di une imprese di Glemone, che e jere cognossude in dute Italie pal so prodot: il sirop di frambue. Chest sirop al à vût une vore di premis e di ricognossiments.
Propit par chest a Vasinis ogni an a fasin rivivi cheste tradizion mediant de Fieste de Frambue e de Cernicule, che si ten tal secont fin setemane di Avost.
La ocasion e je la miôr par lâ a viodi ducj i bielissims lucs ator di Vasinis, soredut il Lâc di Cjavaç, clamât ancje dai Trê comuns, propit parcè che al tocje il comun di Trasaghis, di Cjavaç e di Bordan. O stin fevelant dal plui grant lâc de Regjon: e esist ancje une liende che e conte che il lâc si sedi formât cu lis lagrimis dal cîl coladis jù come ploie.
Li dongje al merte fat un salt a Bordan, il paîs des paveis: chest parcè che a son deventadis tal timp famosis lis paveis che a stan sui monts parsore il paîs. A Bordan si cjate ancje la Cjase des Paveis, une sorte di museu di chestis piçulis besteutis che a vegni di dut il mont, par no fevelâ po di ducj i dissens piturâts sui mûrs des cjasis, di ducj i colôrs e di dutis lis formis. ■
Cinzia Collini