AGRICOLTURE. La verze, la regjine puare dal Invier

Jenfri lis verduris, e je dal sigûr la regjine dal Invier, tignint presint ancje che in cheste stagjon no son masse i prodots de tiere. Ma se il lidric ros di Trevîs al è forsit la part plui nobil de verdure di cheste stagjon, la verze e je cence nissun dubi la part plui popolâr, puare – se o volês intindile cussì –, ma semplice e une vore gustose.
A Felet, ogni an a fasin la Fieste di Sant Antoni e le imbinin ae verze. L’imbinament nol è a câs, ancje parcè che a son contis particolârs su la verze e i abitants di Felet.
Chel che al à un tic di pazience e di voie al pues lâ a cirî dutis lis storiis sui paîs di Felet e di Padier. A esistin publicazions che a contin la origjin de “culture” de verze a Felet. Par scuvierzi il leam tra la verze e la comunitât di Felet, bisugne tornâ indaûr fintremai tal Cinccent.
La storie e conte che intai agns, cul aumentâ de int e cul cressi de autonomie religjose, chei di Felet – che viôt câs a jerin clamâts “verzârs” –, a àn tacât a rivendicâ autonomie tai confronts di chei di Padier, clamâts invezit “cogoçârs”.
Stant aes testemoneancis tramandadis di pari in fi nome a vôs, al semearès che in chei timps la int no si sedi nome cjapade a peraulis gruessis, ma che si sedin propit cjapâts a verzis e a cocis! A part lis rivalitâts botanichis tra i doi paîs, la fonde des barufis tra di chei e je plui di dut di gjenar religjôs. In ogni câs, i verzârs di Felet a rivarin a otignî la autonomie religjose di chei di Padier intal 1875, dopo tantis lotis duradis cuasi par doi secui. E cussì, i abitants di Felet a àn decidût di celebrâ la lôr verdure, la verze.
Di fat, propit ai 20 e 21 di Zenâr, a Felet  si è tignude une cunvigne dal titul “Una verza al giorno…” che e à vedude la partecipazion di Mario Turello, Paolo Pastres, Fabiana Savorgnan di Brazzà e Claudio Coccolo. Lis conclusions a son stadis fatis dal assessôr aes risorsis rurâls, agroalimentârs e forestâls Claudio Violino. ■
Cinzia Collini