A Zui 40 agns dopo: Glesie Furlane come il sâl e il levan pal Friûl

“Il document di chel lontant 28 di Avost dal 1974 al anticipave di 40 agns ce che finalmentri si à sintût a dî ancje in Vatican di pape Francesc: che il pastôr al à di vê intorsi l’odôr des pioris (cence ciapâ sù la puce dai cjastrons! i zontarès). Nô di Glesie Furlane no si contìn mai – al ven ordenât te Sacre Scriture di no contâ mai il popul di Diu (1 Cronachis 21,1ss) e o sin ancje nô une porzion di chel popul. Ma vuê o podìn dî che dongje dai predis Glesie Furlane e à ancje tante altre int, laics che nus stan dongje come voaltris usgnot” al à viert cussì bonsignôr Roberto Bertossi, president di Glesie Furlane, l’incuintri pal aniversari di fondazion dal grup, nassût di chel befel firmât ai 28 di Avost dal 1974 a Zui. “A son chês robis che tu fasis sul moment, cence pensâ che a puedin deventâ storie” al è stât il coment di pre Laurinç Dentesan che al è intervignût te stesse catedrâl par memoreâ chê zornade “A son passâts 40 agns, une vite interie di bataiis, che la jerarchie e à sopuartât plui che supuartât! Ma o vin rivât a fâ tantis robis distès, ancje se al è tant ce fâ e scombati inmò”.
A son restâts dome lui e pre ‘Sef Cjargnel, che o vin intervistât sul numar di Avost, di chei 10 o probabilmentri 12 predis che in chê dì a àn protestât cuintri dal ‘No’ dai vescui Battisti e Pizzoni che no àn volût celebrâ la messe par furlan. “O jerin dome predis, dome cjargnei, nancje un talian: dulà jerial il probleme? Ma no àn volût e alore no vin podût tasê: mal viôt inmò l’arcivescul Battisti, che nol saveve plui di ce fâ di nô. Al è passât cualchi secul de ultime volte che un trop di predis al veve preparât e lassât suntun altâr un document di critiche: al jere dal 1054 a Costantinopoli cuant che la Glesie ocidentâl e je lade a protestâ cuintri dal Patriarcje de Glesie orientâl e lu à scomunicât. Noaltris no vin scomunicât nissun, ma une azion cussì fuarte e je restade un fat unic te storie de glesie resinte” al à continuât pre Laurinç “Resonant su chel document che o vin lassât sul altâr prin di lâ vie cence concelebrâ la messe, e che vuê pre Roman nus à tornât a lei, mi somee che no vevin scrit tant mâl”.
Pre Laurinç al è lât indevant ricuardant i antefats (la mozion dal Clero dal 1967, firmade di 529 predis e scjafoiade dal democristian Toros, che al à ricatât il vescul Zaffonato obleantlu duncje a fâle ritirâ; lis primis messis e lis primis traduzions par furlan, ndr), ma ancje lis conseguencis di chel befel (“No stait a vê pôre: in curie al è dut conservât cun precision…”) e i oms che a àn compagnade la storie di Glesie Furlane: dal ‘patriarcje’ pre Checo Placerean, a pre Antoni Beline, ma ancje al arcivescul di Gurize Pieri Cocolin, furlan, che par prin al à dât il so permès par scomençâ a tradusi il prin messâl.
E intant che la vôs di pre Laurinç ogni tant e tremave “No varès pensât, ma vuê o scuen ameti che un pocje di emozion le ai!” la tante int (a jerin ancje il president de Provincie di Udin Pietro Fontanini, il conseîr regjonâl Claudio Violino e i sindics di Listize Geremia Gomboso e di Cjarlins Diego Navarria, ndr) che e à jemplade la catedrâl di Zui e scoltave cidine chest viaç te storie no dome de glesie o di Glesie Furlane, ma di dut il Friûl.
Dopo i Gjespui cjantâts pe ocasion, al è intervignût ancje il prevost di Zui Giordano Cracina che al à sierât cun ‘trê peraulis’ come che al à dit lui “La prime: un agrât di cûr par ducj chei che si sintin furlans, che a àn viodût in chest trop di nestris confradis il coragjo, la fuarce e ancje la pazience di sopuartâ la nestre Mariglesie che cualchi volte e je ‘matrigne’, ma che e je simpri la nestre mari. Duncje un agrât par dut ce che o vês fat in chescj 40 agns: o pensi che al è un compliment che ducj a puedin fâus cul cûr traviers la mê bocje. La seconde peraule e je une sperance: o pensi che bisugne capî di jessi come il levan e il sâl. Se il sâl al reste dûr e no si disfe te aghe nol puarte il savôr a dute la aghe. E se il levan nol fâs fermentâ la paste, chel pan nol jeve. La sperance duncje e je che te glesie che e vîf in Friûl o podedis jessi chest sâl e chest levan. E par ultin un invît: us invidi fin tant che o sarai prevost di Zui ogni an a fâ l’aniversari achì, ogni 28 di Avost come che si fâs pal complean. O cirarìn di dâi risonance inmò plui grande in mût che cheste testemoneance che si trasforme in compliment e in sperance par che dute la Glesie dal Friûl e puedi cjapâ il savôr de sô identitât, de sô fede e de sô culture, e traviers cheste presince di preiere, di testemoneance e di amicizie e podedi realizâsi ancje par ducj noaltris»! ❚
Christian Romanini