A tornin lis “Lezions di Autonomie”, mai cussì necessariis come in chest periodi storic

A tornin pal tierç an lis Lezions di Autonomie, la schirie di apontaments par fâ cressi une gnove gjernazie di autonomiscj furlans, che e cjali il teritori cuntun voli preparât e concret.
In Parlament e je stade fate buine une riforme costituzionâl, che tra lis altris robis e gjave il Senât de Republiche. L’aiar che al tire pes regjons nol è dai plui bogns.
Se confermade, ca di pôc la Aministrazion regjonâl e varà di meti man al Statût. Il teme di chest an al è in ce maniere che si pues pensâ une scuele di democrazie tornant a scrivi la gnove cjarte di identitât di cheste regjon.
Magari copiant ce che altris comunitâts di minorance a àn fat in altris bandis de Europe o partint de cognossince di ce che o sin e de grande tradizion che o vin e che forsit nancje no si visìn.
Miercus ai 2 di Març si è za davuelt il prin incuintri, il teme al jere Caro modello Friuli…
Il sisteme economic furlan dal post taramot tegnial ancjemò?. Ve chi il program di chei altris incuintris:
***Miercus ai 9 di Març 18.30-20.30
E presente Elisabetta Basso, Presidente de A.C. “La Grame”
Energjie e autonomie – Provision energjetiche e difese de specialitât
Matteo Mazzolini, diretôr de Agjenzie pe Energjie dal Friûl-VJ
Fulvio Stel, professôr di Fisiche de Atmosfere te Universitât di Triest
***Miercus ai 16 di Març 18.30-20.30
Al presente Christian Romanini, Glesie furlane
La autonomie dal Friûl austriac… e il rûl dai predis
Ferruccio Tassin, vice president dal ISSR (Istitût di studis sociâls e religjôs) di Gurize
Mons. Duilio Corgnali, plevan di Tarcint
***Miercus ai 23 di Març 18.30-20.30
Al presente William Cisilino, diretôr de ARLeF
Junts pel sí – Unîts pe indipendence. Il procès di autoguvier in Catalogne
Marc Gafarot i Monjò, gjornalist catalan espert dal procès di indipendence tal CIDOB (Centri di Barcelone pai Afârs internazionâi)
Corsiche, Scozie, Paîs Basc, Catalogne, Friûl… Europe
Marco Stolfo, modul Jean Monnet MuMuCei, Universitât di Udin
***Miercus ai 30 di Març 18.30-20.30
Al presente Michele Calligaris, gjornalist di Telemare
Autonomie e Democrazie. I numars de Socializazion umane
Franco Fabbro, professôr di neuropsicologjie des lenghis te Universitât di Udin
Il cors al è a numar sierât, par informazions o par partecipâ si à di notâsi doprant la schede di adesion o scrivint une e-mail a la direzion: aclagrame@libero.it.
A ducj i partecipants ur vignarà dât un atestât di frecuence e il materiâl didatic metût a disposizion dai docents. ❚
✒ Redazion