A Plan di Cuel di Rualp une gnove fatorie didatiche

A Rualp, piçule frazion dal Comun di Darte, ai 4 di Jugn e je stade screade la Fatorie didatiche e agriturisim “Plan di Cuel”, e pai fradis Bombardier e je scomençade une gnove aventure.
◆ “Il prin mês al è stât impegnatîf – e dîs Rosanna – parcè che o vin vût di capî cemût che e funzionave. Jo no ven di une realtât di ristorazion e duncje o ai scugnût imparâ robis che no savevi. O soi simpri stade une imprenditore edîl. O soi contente parcè che o ai colaboradôrs zovins e dal puest, e o soi convinte che cheste e sedi une esperience par cognossi di dongje cheste realtât e par inamorâsi di ce che o vin achì di nô. Il cogo al à 32 agns, il rest dai colaboradôrs tra i 17-18 agns.”
◆ Tal agriturisim si puedin mangjâ prodots tipics cjargnei, in particolâr i cjarsons fats di Rosanna cu la recipe di sô none, polente e frico, strucul di mêi di lôr produzion e strucul di scuete fate in Cason di Lance, e v.i.
◆ Dongje e je ancje une oficine e un magazen pes bicicletis eletrichis che a vegnin dadis in afit. “Cun di plui – e conte Rosanna – , culì un al pues sostâ e al à la pussibilitât di fâsi une doce, in maniere di cjatâ un pocje di pâs e di trancuilitât dopo di un zîr fadiôs… Nô no sin tal plan! In plui, o vin creât diviers percors par valorizâ chest teritori: fin te Plêf di Sant Martin, a Cjaserualas – indulà che al è il sît dai pagans –, in malghe Val Medan, in Cason di Lance, che di chest an o vin in gjestion nô e indulà che si puedin cjatâ ancje i nestris prodots di malghe.
◆ Di trê agns o vin la certificazion ICEA pai nestris prodots di ort biologjics. Se tu vûs vignî, ti din la pussibilitât di sielziti di bessôl la verdure dai orts (chest an al è dut indaûr par colpe de stagjon matarane). Se un al vûl, al pues lavâsi la verdure e mangjâle sul puest, o se no le puarte a cjase. Dopo, o vin la fatorie didatiche che e partirà fra un pôc e che e sarà vierte aes scuelis e aes fameis, che cussì a podaran passâ un pôc di timp ca di nô, mangjâ i nestris prodots e –  parcè no – fâ cualchi biele cjaminade.
◆ O vin cirût di puartâ un pocje di armonie e di funzionalitât par fâ tornâ a vivi chest paîs indulà che nol jere plui nuie. Dopo il Covid, l’unic Cral che al jere al è fer (no sai se al tornarà a vierzi) e duncje e jere bisugne di vê un puest indulà che la int si podès cjatâ par stâ in compagnie, bevi alc o mangjâ un gjelât. A son personis che a vivin di bessolis a cjase e che a vegnin sù achì a mangjâ, cussì a passin chel moment insiemi cun nô. Il nestri ambient nol è sofisticât, anzit al è un grum sempliç e familiâr. O vin dât fuarce ae nestre ativitât za inviade par dâ un sburt al nestri paîs di mont. O soi simpri stade convinte che al fos just fâ alc achì. O ai simpri vivût ca sù e insiemi ai miei fradis Laura e Loris o vin decidût di invistî lis nestris ativitâts economichis (edîl, boschive, bed and breakfast e ristorazion) simpri tal comun di Darte, parcè che o volìn ben al nestri teritori. Unic probleme: o vin il soreli, o vin aiar bon, biei paisaçs, ma pocjissime rêt internet.”
◆ Ma chel, intun lûc indulà che si respire la pâs e la trancuilitât, vadì che nol è nancje tant un probleme!
Cui che la vûl savê alc di plui al pues cjalâ sul sît https://www.fattoriadidatticaplandicuel.com/#la-fattoria-didattica, o te pagjine facebook https://www.facebook.com/Agriturismo-Plan-di-Cuel-105484405109322. ❚