A Madrid la memorie democratiche e devente leç, ma i catalans no son sodisfats

Il Parlament dal Ream di Spagne ai 14 di Lui stâts, cun 173 vôts a pro, 159 cuintri e 14 astensions, al à fate buine la leç su la memorie democratiche, che e promôf il ricognossiment e la ricercje dai crimins dal franchisim, e fisse tant che “politiche dal Stât” la ricercje e la esumazion dai sparîts dilunc de vuere civîl e la ditature (une cuistion une vore sintude in dut il Stât spagnûl, cemût che al salte fûr ancje intal cine plui resint di Pedro Almodovar, “Madres Paralelas”), e e declare la ilegalitât dal regjim franchist e la nulitât des risoluzions dai siei tribunâi.
◆ La iniziative legjislative e je stade promovude dai doi partîts di guvier (PSOE e Unidas Podemos) e e à disvilupât un dibatiment une vore cjalt. Di une bande la diestre spagnoliste (Partido Popular, Vox e Ciutadanos) i à fat cuintri par cuistions di contignûts, platant lis sôs plui o mancul fuartis nostalgjiis franchistis daûr de valutazion de leç tant che «divisive» e «cuintri de libertât di opinion», e ancje par cuistions di metodi, denunziant il fat che il test finâl al sedi stât definît ancje cu la poie de çampe nazionalitarie basche, tornant a cjapâ sù in maniere strumentâl la cuistion de lote armade di ETA. Di chê altre, il test finâl nol à dât sodisfazion compagne a dutis lis fuarcis politichis che a son espression des nazionalitâts storichis, che par chel a àn cjapât sù posizions diferentis. I bascs centriscj dal EAJ-PNV e chei di çampe di EH Bildu a àn votât a pro e a àn fat compagn i liberâi catalans dal PDECat, intant che la Çampe Republicane di Catalogne (ERC) si à astignude e i catalans centriscj di JxCat e chei di çampe de CUP a àn votât cuintri, motivant ognidun la sô posizion cul fat che il proviodiment al sarès masse “flap”, soredut par vie che nol va a tocjâ la leç de amnistie dal 1977 e duncje nol permet di investigâ e judicâ i crimins e i criminâi franchiscj.
◆ La leç e à vût ancje i vôts a pro dai deputâts di Más País, la rêt progressiste ecosocialiste metude adun a nivel statâl che e je avonde inlidrisade ancje tai Paîs Catalans.
◆ Intant che tal Congrés si svicinavisi ae votazion de leç su la memorie democratiche, ancjemò ai 2 di Lui stâts tra Paîs Basc e Catalogne e vignive metude in vore une iniziative rivendicative une vore particolâr, la Vie Pirenaiche (“Via Pirinenca” par catalan e “Pirinietako Bidea” par basc). Cul intindiment di rivendicâ il dirit di autodeterminazion dai popui, in tancj di lôr a son lâts in mont e vie pe gnot a àn inluminât passe tresinte pichis dai Pireneus.
◆ Lis monts che a dividin il Stât spagnûl e il Stât francês e che a tegnin dongje Paîs Basc, Aragon, Ocitanie e Catalogne za di cualchi mês a son ogjet di une altre mobilitazion, che e tocje in particolâr i Pireneus catalans. Cul intindiment di fâi cuintri ae intenzion dal guvier di Barcelone di fâ indenant la candidature de capitâl catalane e des monts par inmaneâ lis Olimpiadis di Invier dal 2030, si àn dât dongje associazions e comitâts, denunziant la no sostignibilitât ecologjiche e economiche di une iniziative di chê fate, massime tignint cont dai mudaments climatics in vore. Cemût che e dîs la cjançon “La Terra per Sembrar” che e promôf la azion, lis “tieris altis” a àn di jessi vivudis e coltadis e no jempladis di ciment e scjafoiadis cun iniziativis speculativis. Tal Paîs Basc, dai 22 ai 24 di Lui, e je stade inviade ancjemò une altre mobilitazion: la cuistion e je chê des cundizions dai presonîrs politics bascs e la azion di sensibilizazion metude in vore e je stade chê de cuinte edizion de Corse in biciclete (Bizikleta Iztulia) “dongje de strade di cjase” (“Etxera bidea gertu”). ❚