Luca Nodale e Orietta Gressani a son i titulârs de Aziende Agricule “Bioapicoltura Pura”. Dut al è scomençât un pôcs di agns indaûr: “il gno om – e dîs Orietta – al à tacât chest lavôr che a son cirche 12 agns. Lui al faseve il camionist e par passion si jere svicinât al mont des âfs. Une dì al à decidût di cambiâ vite e duncje al à lassât il lavôr e al à tacât cu lis âfs. Un pôc par volte, ben planc, fin a rivâ a vuê che o vin 300 bôçs operatîfs.
◆ O vivìn cu la nestre famee (o vin doi fîs) in localitât Pure a Davai di Lauc, un puest fûr dal paîs, isolât. Un pâr di agns fa o vin aderît a un progjet P.S.R. (Program di Svilup Rurâl): jo e il gno om o vin costituide une societât, o vin metût sù un laboratori pe dismiladure e o vin ristruturât un stabil dongje cjase nestre, tacant a lavorâ insiemi.
◆ Il nestri prodot, la mîl, al è biologjic e chest al è dal sigûr plui dificil, costôs e riscjôs. Riscjôs par vie che tratâ lis âfs in biologjic in chest moment storic, indulà che l’incuinament al è devastant pe nature, al è cetant plui impegnatîf.”
◆ Ma a son stagjons e stagjons: “chê passade – e va indevant Orietta – e je stade dramatiche, tal sens che la mîl che nô o produsìn di plui dal pont di viste de cuantitât – la prime racuelte – e je saltade par vie che lis glaçadis dal mês di Avrîl a àn comprometût dut. Nancje la stagjon dopo no je lade masse ben, anzit! O vin fat juste alc di tei.
◆ Se la stagjon e va ben, o vin diviersis varietâts di mîl: agace, tei, milflôrs, ogni tant la melade di bosc, cjastinâr, raut e milflôrs di alte mont (o lin in malghe Vinadie). E po dopo, chei altris prodots des âfs: pape reâl e polin.”
◆ Ogni an, la Aziende e partecipe cui siei prodots a concors nazionâi par sondâ lis cualitâts, e in cont di chest Orietta e conte cun sodisfazion: “o vin cjapât dôs voltis il prin premi tant che miôr mîl di tei di Italie. La nestre mîl e je un prodot un grum preseât e di un ciert nivel.”
◆ I prodots si cjatin intal spaç in localitât Pure, e ancje intes buteghis de Cjargne e in cualchidune de Basse.
◆ “Chest an – e va indenant Orietta – no vin podût furnî ducj i negozis propit par vie che e mancjave la mîl (une sielte che nus à segnât a nivel economic, e no pôc!), però o ai vude la sodisfazion che tancj clients – no cjatant tal negozi il prodot – a son vignûts achì di cjase.”
◆ E in cont des dificoltâts de gjestion di une aziende in mont, Orietta e dîs: “A son dutis chês di chei altris che a àn come nô cheste ativitât. I problemis plui grancj che o vin nô apicultôrs a son leâts ae politiche. Nô no vin un jutori: se la anade e va mâl, no vin une forme di contribût o di ricognossiment economic di nissun gjenar che nus tuteli. Di bande de Regjon, al volarès un jutori che al cjapàs dentri ancje il nestri mont: cuntune anade tant che chê passade, une aziende come la nestre e riscje di sierâ… In trê agns e je za la seconde che e va mâl… Par me, a nivel regjonâl a varessin di ativâsi di plui, dant un contribût par ogni bôç, come che si fâs in altris Stâts! E sarès une bocjade di ossigjen. Par mantignî la mê famee, o ai un lavôr di un pocjis di oris par setemane: e par fortune che lu ai, parcè che tes anadis come chestis no son jentradis! L’an passât o sin partîts cun 90 bôçs di mancul, tamesâts de murie.”
La fevelade cun Orietta e finìs cu la sperance che “chest an al sedi miôr e che ti puedi invidâ a cerçâ lis varietâts di mîl che o fasìn intal nestri laboratori biologjic”.
Se e je vere che lis âfs a son un element impuartant pe salût e pe vite de nestre tiere, i sorestants a varessin di cjalâ cuntun voli di rivuart chestis ativitâts. Vivi la mont al è ancje chest. ❚
