La leç che e regole l’ûs de lenghe furlane e creve i ecuilibris
cu la minorance furlane che e finìs in serie B
✽✽ Cualsisedi robe che e puedi sucedi tal timp che al passarà tra il meti jù di chest scrit e la sô publicazion, nuie, nissun acjadiment, ancje se di rimarc, al podarà passâ la impuartance di ce che al è sucedût cu la sielte fate de zonte regjonâl e sostignude, in maniere passive e cence nissune dignitât, de maiorance di cumò, furlans leghiscj in cjâf (aprofondiment a pagj. 3, ndr).
Cu la decision di butâ jù ogni emendament mioratîf de leç che e regole l’ûs de lenghe furlane, cheste aministrazion e à mostrât la sô vere muse e i siei intindiments su la cuistion furlane.
✽✽ No si trate – cemût che cualchidun al à volût biel a pueste, e cun fraude, fâ crodi – di une cuistion di bêçs, di finanziaments regjonâi di assegnâ a cheste o a chê associazion. No si trate nancje di riorganizâ il setôr. Si voleve colpî invezit la essence stesse di un concet: il popul furlan al esist tant che entitât ben definide e e je la maiorance di cheste regjon.
✽✽ Une prove palese di cheste concezion e je intal acaniment che a àn vût cuintri dal nestri gjornâl, cjapât no par câs tant che simbul de pueste e dal scuintri in at. Il discognossiment intai fats, e no intes declarazions di façade che a circolavin intai coridôrs dal palaç, di ce che e rapresenti cheste testade, chel non – “La Patrie dal Friûl” – che al riassum la storie coletive de nestre int, al à volût jessi un segnâl clâr di cemût che si vûl frontâ il rapuart tra Friûl e Regjon.
✽✽ E je une “declarazion di vuere” precise, une esposizion articolade di cemût che cheste istituzion e vûl tratâ il belançament tra lis dôs realtât che le componin. O ribatìn par jessi clârs: il Friûl e Triest. La volontât politiche di Fedriga e socis no à inciertecis: il Friûl intindût tant che entitât politiche teritoriâl, sociâl, storiche nol esist plui. La lenghe, che a ‘nt rapresente l’aspiet plui riveladôr, e à di tornâ a jessi un ogjet di conservâ tant che repert museâl, bon di esibî in cualchi festival dal folclôr. La sô storie e va tirade fûr dome in ocasion di une disfate, viôt la fin dal Patriarcjât di Aquilee che e fâs risaltâ la potence di Vignesie intal progjet dal assessorât ae culture. Pal rest, no bastie forsit la esaltazion de italianitât e de piçule patrie, pronte a imolâsi par un ben plui grant?
✽✽ Se cheste regjon, cuntun destin infeliç fin di cuant che e je nassude, e podeve jessi rapresentade apont di une belance, cheste ca si è rote in maniere progressive. Prime si è tarât il plat julian, vuê si gjave chel furlan, e cussì adiu ecuilibri. Il strument nol covente plui.
✽✽ I elements che a costituivin la struture si sostituissin cun altris tocs, il cuadri al ven semplificât: cheste e je une regjon taliane cuntune minorance ricognossude a ducj i efiets e cun ducj i beneficis, o ben chê slovene; po, e je cualchi isule gjermanofone ancje chê tutelade; e dopo une minorance – che in realtât e je maiorance – tant che chê furlane, che e finìs in serie B parcè no je plui calcolade come la comunitât slovene.
✽✽ No dome si cree une division pericolose tra furlans e slovens, soflant su contraposizions antighis, ma si scancele un dai pilastris de specialitât, ven a stâi propit la presince des minorancis linguistichis che a àn di gjoldi dai stes dirits di tutele.
✽✽ Ce fastidi cheste peraule – “tutele” – come se no fossin in stât di abadâ a nô, ma il nivel di sorevivence de lenghe al è metût tant a pericul che pal legjislatôr a coventin stuments particolârs.
No je dome une bataie culturâl chê che si è daûr a combati tra nô e il podê regjonâl: daûr e je une vision che e previôt l’acentrament economic e finanziari su lis rivis dal Adriatic, cuntun Friûl tiere di passaç e di servitûts, cence progjets di disvilup futûr, cuntune mont dispopolade, cuntun teritori divorât dal ciment e dal degrât ambientâl, cui nestris zovins costrets a emigrâ.
✽✽ A Triest, a Rome a vuelin dineâ, distruzi la idee che e puedi esisti la “Patrie dal Friûl”, no dome tant che gjornâl, ma tant che idee di un popul. A son pericolôs, malfidâts e fuarts.
Nô, però, plui di lôr. ❚
Dree Valcic
