Imparìn a lotâ pai nestris dirits
✽✽ Di resint, in sale Ajace, a Udin, si è tignude la Conference internazionâl sul teme dai rapuarts tra Stâts in materie di minorancis, inmaneade dal Alt comissari su lis minorancis nazionâls de Organizazion pe sigurece e la cooperazion in Europe (Osce) Lamberto Zannier. Doi dîs, tra Udin e Vilalte, cuntune schirie di esperts, ricercjadôrs, ambassadôrs e rapresentants dai 57 Stâts dentri de Osce par fevelâ des esperiencis e des miôr pratichis metudis in vore ta chei Paîs, a 10 agns de adozion des “Racomandazions di Bolzan/Bozen” che la Osce e veve presentât tant che liniis vuide sul tratament des minorancis nazionâls tai rapuarts internazionâi.
✽✽ Oportun l’invît al Parlament talian a ratificâ la Cjarte europeane des lenghis regjonâls o minoritariis de bande di Zannier (che al è di origjins furlanis) e dal sindic di Udin Pietro Fontanini. Pecjât che tra lis diviersis esperiencis presentadis nissune peraule e sedi stade spindude pes minorancis dal puest – cun di plui che a son ricognossudis uficialmentri -, pes lôr problematichis. Di bon che la Conference e à vût il sostegn de Regjon Friûl-Vignesie Julie, oltri che dal Comun e de Universitât di Udin e de Associazion Mitteleuropa! E al fâs pensâ no pôc che te capitâl dal Friûl no si feveli di furlan – e sloven e todesc – e che invezit par une setemane interie, dai 11 ai 19 di Avost, lenghe, culture e musiche furlanis – contadis di DJ Tubet, “ambassadôr” furlan di gale – a saran al centri dal Mem-Livingroom of languages a Leeuwarden, in Olande, Capitâl europeane de culture 2018.
✽✽ E intant che il Consei regjonâl de Sardegne al à fate buine la leç di politiche linguistiche sarde li che si previodin misuris di tutele e di promozion ancje pal catalan di Alguer e pes varietâts galuresis, sassaresis e tabarchinis, in Friûl-Vignesie Julie si continuin a scontâ ritarts te aplicazion de normative di tutele, sedi a nivel regjonâl che talian, tant che o din cont ancje su chest numar da “La Patrie dal Friûl“. Lis leçs di tutele a son, i dirits su la cjarte a son ricognossûts, ma chês leçs no son metudis in vore ad implen e i dirits, duncje, a son violâts.
✽✽ A fasin alore ben sperâ ta chest moment lis peraulis dal President dal Friûl-Vignesie Julie, Massimiliano Fedriga, che, vierzint i lavôrs de Conference Osce, al à dit di jessi «braurôs di rapresentâ une regjon che e à savût valorizâ, fin de sô fondazion, il patrimoni linguistic e culturâl des tantis minorancis presentis sul so teritori». E ancjemò: «Autonomie e minorancis a costituissin ereditât dal lunc cjamin di specialitât dal Friûl-Vignesie Julie che vuê o sin clamâts a difindi, in non di une rilevance che no je dome culturâl e identitarie, ma politiche».
✽✽ Si spietìn alore azions concretis su chescj plans de bande dal President Fedriga, cun di plui che «il Friûl-Vignesie Julie – al à marcât – al è tant atîf cul Stât centrâl sul plan dal ricognossiment e de tutele des minorancis». Si spietìn une politiche linguistiche regjonâl di valorizazion ative, tant che a insegnin altris realtâts che a àn savût lotâ tai agns pai lôr dirits. Cui lôr politics, in prime linie, a difindiju cun fuarce e braùre, juste apont. ❚
di Erika Adami
