Salvìn I Colonos, simbul dal Friûl
Intai ultins 30 agns, i Colonos a son stâts pal Friûl une lûs e une trincee di resistence culturâl: un contest dulà che la culture furlane e à savût metisi in mostre e confrontâsi cui temis, lis sfidis, e cu lis contradizions de “modernitât”, cence adagâ il sens (e la braùre) de proprie identitât origjinâl. Pai Colonos e je passade cualchidune des esperiencis culturâls plui preziosis che a àn instreçât il presint e il passât de nestre tiere cu lis contaminazions contemporaniis plui stimolantis. In chê arie e je nassude la rileture seniche di Elio De Capitani dai “Turcs tal Friûl” di Pier Paolo Pasolini; li Pierluigi Cappello al à clamât dongje il miôr de poesie furlane par “I colôrs da lis vôs”; in chel compendi a jerin di cjase Elio Bartolini e Amedeo Giacomini, Tito Maniacco e Giorgio Ferigo, cussì tant che Philippe Daverio e Carlo Sgorlon; li si son disvilupâts i progjets musicâi dai FLK e lis provocazions inteletuâls di tancj protagoniscj de dramaturgjie, de art visive, dal cine e de storiografie di cjase nestre. Nô, che o vin vivût cheste stagjon lungje 30 agns, o savìn trop che chel lûc al vedi contribuît a consolidâ in nô la cussience di un Friûl che si pues jessi braurôs: un Friûl dinamic e creatîf, cussient di se e des sôs ecelencis (dispès ignoradis), zelôs des sôs lidrîs, ma propit par chest viert al mont e aes sfidis dal futûr, convint – cemût che al varès dit Pasolini – di vê un propri contribût origjinâl di puartâ al disvilup plui gjenerâl de Civiltât umane.
◆ Ma cumò dut chest al è comprometût in maniere serie: l’edifici che al è stât il teatri e il simbul di cheste rinassite de nestre identitât culturâl al è finît ae aste judiziarie, e il so destin al è inciert tant che mai.
◆ Al è un cop che nus cole intor intal moment piês. Il Friûl, cu la pandemie, al vîf une situazion che e ricuarde il dopo taramot. E je une ricostruzion di fâ partî, e la nestre Comunitât e à di determinâ il sens e la cualitât di cheste gnove fase. Intal ‘76 la ricostruzion materiâl e je stade precedude e sostignude di une cjapade di cussience civîl e culturâl che e à dât forme e sostance al “Model Friûl”. Vuê nô no podìn permetisi di tornâ indaûr a pet dal “Model” dal ‘76: cuntune ricostruzion burocratiche cence anime no si va di nissune bande. Par cjatâ fûr il spirt de ripartence e par dâi significât, nus coventin simbui e narazions positivis, ma ancje moments e lûcs di confront e di elaborazion. Nus coventin lûcs-laboratori pe riflession sul futûr de nestre Comunitât. E je la funzion culturâl e civîl che i COLONOS a àn fat par 30 agns e che no pues restâ scuvierte.
◆ O vin di inventâsi alc. La sielte plui naturâl e je chê di impegnâsi a fâ rinassi i COLONOS, tornantsi a apropriâ dai nestris simbui e lûcs. Mi auguri che ducj i furlans — operadôrs culturâi, imprenditôrs, politics, inteletuâi, citadins cussients — a sintin il riclam ideâl a fâ partî il progjet COLONOS 2.0: un spazi dal pinsîr dulà che a butin fûr e a menin lis ideis e lis fuarcis di un gnûf inizi pe nestre Tiere.
◆ Mi permet, duncje, di indreçâ une CLAMADE a ducj chei che si sintin furlans par che a contribuissin, ognidun pes sôs pussibilitâts, ancje piçulis, ae racuelte di fonts.
◆ La sume necessarie e je impuartante, ma o crôt che in Friûl al sedi un numar di furlans degns di chest non plui che suficient a racuei la cifre che e covente. Dal sigûr ancje jo o fasarai la mê part.
◆ Cui che al vûl contribuî al pues fâlu midiant di un bonific bancjari:
IBAN IT21Z0548464070101570001344 cun causâl “Erogazion liberâl ae Associazion Culturâl Colonos”, specificant Non e Cognon dal donadôr. ❚
