Bencjatâts intal 2021, l’an che la pandemie … al puartarà vie! Cheste e je la sperance di ducj, ma stant che nol è il nestri mistîr chel di strolegâ, lassìn pierdi la ambizion di previodi l’avignî. Cjalìn il presint, il dì di vuê: ce Friûl nus lassial l’an disgraciât che o vin sierât? Al è un Friûl che o crodevin ducj plui organizât e cussient, ma che la seconde bugade dal virus nus à mostrât tal spieli in dute la so insigurece.
◆ No si fevele de capacitât e de dedizion dai operadôrs sanitaris, ni de fuarce de solidarietât che tantis realtâts a puartin indevant ogni dì: chês a son la muse miôr che o podìn mostrâ. E je invezit pardabon mancjade la vision di ce che al sarès podût sucedi, la prevision che i furlans a àn simpri fat di “un mâl di gnot” o “in câs di vuere”: la Storie nus à usâts a doprâ inte nestre lenghe chescj mûts di dî, parcè che la colme di vueris e invasions, di taramots e aluvions che o vin frontadis tai secui nus à insegnât il valôr dal viodi e previodi. Ma in chescj ultins mês al somee che chest insegnament al sedi stât dismenteât: al pont di domandâsi se tal Dna dai furlans a restin ancjemò lis olmis di cheste ereditât.
◆ Stant che la prime bugade nus veve sparagnâts, o varessin vût di fâ cressi i puescj di terapie intensive, disvilupâ metodis par usmâ i contats di cui che al è stât infetât, pensâ a metodis par scurtâ i timps dai tampons e no fâ deventâ il Covid-19 un afâr pai privâts che a àn cjapât il puest di une sanitât publiche che no rivave a stâ daûr aes bisugnis de int. Ma chest nol è stât fat e ce che al è sucedût al è denant dai voi di ducj: voi che aromai a son suts di lagrimis, ma che a àn scugnût viodi plui di doi mil vitis pierdudis par cause di une epidemie che no vin savût controlâ miôr.
◆ Dit ce che al è di dî, par amôr di veretât, bisugne tornâ in pîts. Il 2021 al à di jessi l’an dal nestri riscat. Come tal 1946, l’an che e je nassude la “Patrie dal Friûl”: chest gjornâl al è vignût fûr des maseriis de nestre tiere fate a tocs di dôs vueris mondiâls e di vincj agns di ditature. Purpûr Josef Marchet e Felix Marchi, un predi e un anarchic, a àn savût meti dongje lis lôr risorsis par fâ nassi une gnove sperance. Par nô, jessi achì a tignî vive la lôr creature 75 agns dopo nol vûl dî dome jemplâ un sfuei di fufignis, ma cirî di imitâ il lôr esempli, e tirâ dongje ideis e progjets di ducj chei che a àn voi di metisi a disposizion par meti jù lis fondis dal Friûl di doman.
◆ Un Friûl che al scuen tornâ a nassi a partî des sôs comunitâts, e par chest o vin sielzût chest an di dâ la peraule ai sindics che a fasin part de Assemblee de Comunitât Linguistiche Furlane. Ju scoltarìn intune rubriche che o vin clamât “Sindic jo mame”, parcè che il sens di servizi ae int che vuê al è incjarnât dai prins citadins al è simil a chel che i alpins, ma ancje i volontaris de Crôs Rosse, de Protezion Civîl e di tantis altris realtâts dal sociâl a puartin indevant ogni dì. Il sburt che nus covente par rinassi al ven di int come lôr. ❚
