RICUART. Mandi Galliano

No vuei, no volarès fevelâ di Galliano. Ce tant che o varès miôr fevelâ CUN Galliano. Sintî, incantesemât, une de sôs cjavalgjadis jenfri storie, antropologjie, latin, poesie, filosofie e, biel che mi zire un tichinin il cjâf intal tentatîf di stâi daûr, domandâmi cuale che e je stade la peraule che e à impiade dute chê flame, che e à inviade chê sorte di conference di culture e di sapience. E, dopo un pâr di dîs, rindimi cont che dutis chês peraulis mi àn lassât alc, une idee, une intuizion, un concet gjeniâl, alc.
Nuie. O soi culì a cirî di disgropâ i ricuarts. Tancj: il professôr, il preside, il coleghe, l’amì. E il poete. Il poete fi de tiere che la tiere al veve savût puartâle drenti inte poesie. O dîs la tiere, no chê stilizade di cui che le cognòs dome par sintût a dî, no. La tiere che e je ancje sporcje, simpri dure, simpri impastade di miserie, simpri plene di sudôr e di sanc. E pûr! E pûr: il pari di bessôl cu lis stelis, la vacje letoane, il respîr di une gnot avostane (e propi in Avost nus à lassâts…), il cjan dal paron, i sotans che a saludin in lenghe taliane pleantsi, la panarie vueide. Poesie.
Un ricuart al salte fûr prepotent. Ogni àn, sul inprim dal an scolastic, si faseve une riunion di ducj i presidis e diretôrs didatics a Cividât, inte scuele professionâl, che e veve ancje il cors di cusine. Naturalmentri si finive cuntun gustâ prontât di chei arlfês e dai lôr mestris. Sul finî dal gustâ, Galliano si jevave sù, al domandave che lis camarelis a stessin fermis cualchi minût, ur faseve un inchin ai sorestants presints (il proveditôr, il soreintendent che, di furlan, no vevin cuissà ce) e al tacave a contâ. Dut inte lenghe dai paris, sicu che al nunziave in esordi. E a cui che i diseve che nol capive… «Oh, scuse – i rispuindeve – scuse. O vevi crodût, par un moment di sedi in Friûl!». Un gjoldiment di ridadis che, come simpri, a lassavin alc di pensâ par cuant che si finive di ridi.
Cumò che o scuen saludâti par simpri, no pues no doprâ ancje jo lis peraulis dai antîcs par chei si ‘nt lavin. Ancje par vie che une di chês cuatri peraulis e je… tiere.
Levis sit tibi terra, Galliano. Lizere ti vuei la tiere. ■
Laurin Zuan Nardin