CJARGNE VIVE. La ‘fabriche’ dai scarpets di Antonella

“Jo o jeri partide cun cheste idee di fâ scarpets inmò agnons indaûr”, e conte Antonella. “Di piçule insù, viodi lis nonis dal gno paîs daûr a pontolâ mi à simpri plasût. Mi à simpri plasût ancje il fat di jessi discolçs e di podê jessi ‘scarpâts’ cun pôc (metint dongje un grum di oris di lavôr) e mi disevi che a pene che o ves vût il timp lu varès fat ancje jo. Cuant che o jeri a stâ a Comelians, o ai cognossude la Gjenovefe che e à tacât a mostrâmi cemût meti adun i peçots. Dopo, o ai viodût il libri di Celestino Vezzi che al veve scrit cun Novella Del Fabbro (“Scarpets e galòcios”, ndr) e alì o ai vût inmò un segnâl: mi soi dite “jo o scuen fâ chest lavôr achì!”. Ma meti sù une ativitât dome di scarpets al è un pôc improponibil parcè che ti mangjin di tassis, e daûr a son tantis oris di lavôr.
E alore, mi è vignude la idee di compagnâle a alc, e a Sudri al mancjave un negoziut di robe intime, sportive, robutis particolârs, e cussì o ai viert chest negozi che prime di dut al è un laboratori di scarpets.
Al pâr parfin impussibil che intal 2012 a sedin richiestis di scarpets. Tantis, soredut, a vegnin dai zovins! O ai une lungje liste di scarpets di fâ (18 oris di lavôr par fânt un pâr, po dopo il cjaliâr al pense a meti la suele).
Pai oms al va plui il model classic, pes feminis invezit al è di dut e di plui: scarpets cu la tele jeans, a forme di balarinis, cui lustrins…
E cussì, o soi intrigade a stâ daûr a sodisfâ ducj i guscj. Cumò o ai di fâ scarpets par un grup di todescs che a àn di fâ un teatri su pe vere storie di doi cramârs che, partîts de Cjargne, a son deventâts sindics di doi paîs là vie. Ma o vent ancje altre robe cjargnele: me sûr e fâs lavoruts cul feret (borsetis, centruts e v.i.) e di Invier o ai une persone che mi puarte robe fate di lane cuete.”
Antonella e rive a trasmeti cun semplicitât une grande voie di fâ e une grande sperance pal doman: “No je vere che lis feminis no son plui inzegnosis, parcè che ancje achì a Sudri o viôt mans di aur.
O soi de idee che in Cjargne nol è impussibil nuie; o pensi che e sarès une salvece tirâ fûr chestis particolaritâts e tornâ a riproponilis!
E volarès a nivel di artesanât une recipe che e puarti cun plui gole la int a fâ; la burocrazie e je chê che e penalize di plui chestis robis. Jo o soi contrarie ai contribûts parcè che a “sentin” la int: al bastarès sbassâ lis tassis. O invidi la zoventût a no vê pôre di proponisi!”. ■
Marta Vezzi