CJARGNE. Fielis, un tesaur di scuvierzi

A 12 km da Tumieç e a pôus minûts di strade de Plêf di San Piêri di Zui, a 830 m. sul livel dal mâr, a si cjate il piçul paisut di Fielis. Il paîs al conte cirche 45 animis che a vivin dut il timp dal an, d’estât chist numar al cres fint a 200/250. Tancj a son i paesans che a tornin a saludâ la lôr cjere ma a son tancj encje i turiscj e i forescj che a rivin da Triest, Vignesie, Milan, Rome par passâ cualchi dì in pâs e trancuilitât.
A Fielis a ‘nd è un grum di cjantons interessants da scuviergi: la cjase “dai moros”, cu la sô struture carateristiche dai archs in piêre metude a nûf pouc timp fa grazie al comun e al intervent des “belle arti”; l’ex latarie sociâl indulà che a si pos viodi cemût che si lavorave il lat dal paîs (ai son encje i regjistros par segnâ la cuantitât di lat che ognidun a puartave); la glesie dal sietcent dedicade a San Roc.
Ma a si cjate encje, inte ex scuele, un piçul bar cun negozi di alimentârs indulà che, prenotant, a si pos mangjâ plats tradizionâi (in particolâr a Fielis a son famôs i cjarsons).
D’inviern Fielis a davente mete di tancj turiscj che cu lis cjaspis a van in Malghe Daude (obietîf tant preseât encje d’estât, lant a pît o in biciclete, dulà che si pues cjatâ formadi e scuete frescje); il percors al davente inmò plui intaressant parcè che lant indavant a si rive prime in malghe Meleit (indulà che al è l’agriturisim) e po’ intal Zoncolan.
“Aveniments che an segnât il paîs – al conte il giovin Cristian Agostinis – a son principalmentri doi: il taramot dal ‘76 che, come dal rest dal Friûl, al à lassât i siei segnos e mi ven tal cjâf la place 19 di març cuant che in timp di vuere i cosacs a vevin di copâ ducj, ma grazie a un miracul ch’al ven atribuît a San Josef a son stâts sparagnâts; da chel an par ringraziâ a si fâs la pussisjion. Par vegni a Fielis a tocje prin di dut vei pasjion pe mont e pe trancuilitât! No si pos pratindi di vei dutis lis comoditâts de sitât! Ma a ‘nd è robis che la sitât a s’insumie di dâ! Tocje dome saveilis scuviergi e preseâ!” ■
Marta Vezzi