LETARIS. A coventin doi partîts furlans

In Friûl a son tancj che a sintin a mancjâ un partît furlan: il pinsîr al va al Moviment Friûl, che però al è conzelât di vincj agns, e ai esperiments che a àn cirût di cjapâ il so puest.
Se si sint cheste mancjance al è parcè che si capìs che al Friûl i covente une espression sô, che no plei il cjâf aes segretariis dai partîts talians; però i esperiments “post-Moviment Friûl” a àn vût pôc sucès e, par puartâ indevant lis resons dal Friûl, tai ultins agns si à vût di cirî cualchi singul referent sensibil, ma elet tai partîts talians. A fuarce di vitis alc si à otignût, ma al è masse pôc: une politiche pal Friûl e vûl une altre strade.
Parcè i esperiments di partît furlan(ist) sono lâts pôc lontan?
Une reson e pues sei che fin cumò si à cirût di fâ partîts “di racuelte”, vâl a dî partîts che a rapresentassin il Friûl tal so complès, cence definîsi a clâr ni di diestre ni di çampe e acetant esponents, simpri autonomiscj, ma di plui impostazions ideologjichis.
Se al somee che cheste carateristiche e unissi l’eletorât, in realtât in Friûl lu à dividût: a son stadis simpri, te storie dal autonomisim furlan, barufis che a vevin di fonde ancje la diference ideologjiche tal stes partît. E l’eletorât devant des barufis si slontane, e se al viôt un candidât che al è autonomist, ma di une vision diferente de sô (a çampe o a diestre) al à cûr di no votâlu par antipatie ideologjiche.
Cumò il sisteme politic talian al torne a jessi in crisi: une azion politiche furlane e pues vê un grant sucès. La societât furlane e je vive e plene di voie di democrazie, baste pensâ a dut ce che si môf cun associazions, comitâts, volontariât, ativitâts produtivis…
Autonomie e autoguvier a vuelin dî plui democrazie, mancul distance tra eletôrs e elets, control diret sul podê: a son temis grancj pe societât di vuê e ancje costantis te nestre storie politiche. Ma fasint un altri partît di racuelte al sarà facil intivâsi tun altri faliment.
Par vê plui pussibilitâts nol covente un partît, ma doi: un partît furlan di centridrete e un partît furlan di centriçampe, che a ledin parie su cierts temis (dal sigûr autonomie, difese des identitâts linguistichis e v.i.) ma ognidun cu la sô vision.
A son câs là che cheste strategjie e à dât propit grancj risultâts: di fat in Catalogne o tal Paîs Basc, dopo dal franchisim, i moviments politics nazionalitaris si son simpri articolâts intune ale a diestre e une a çampe. ■
SANDRI CARROZZO