VIERTIDURE – L’Udin no si discut

Interviste a Massimo Giacomini
L’alenadôr dal miracul, chel che al rivà a puartâ l’Udin de serie C1 ae serie A in dome dôs stagjons (1977 – 1979), al à simpri chê cjavelade e simpri chel tai (un grum stîl Seventies). Dome il colôr al è deventât, naturalmentri, plui di arint. Massimo Giacomini, classe 1939, al è vuê cognossût pal so “coment tecnic” aes partidis di Di Natale e compagns, coment che al presente tes trasmissions di Telefriuli. Ma no covente jessi apassionâts di balon par savê che daûr dal om al è un curriculum sportîf començât prime come zuiadôr tal 1957, in maie blancje nere, lât indenant tant che alenadôr e finît come dirigjent Figc. Il microfon lu cjapà pe prime volte in man tai mondiâi dal 1986 par Tmc, insediant chel che al jere un teritori a ûs monocratic de Rai. Lu intervistìn propit cuant che sui gjornâi e ven pandude la gnove che in Spagne, la finâl de “Copa del Rey” e viôt sul cjamp catalans cuintri bascs: Barcelone vs Athletic Bilbao.
Mister Giacomini, curiose no mo cheste finâl?
A son dôs regjons che a àn une legjislazion particolâr che ur conferìs un grum di autonomie. E il discors de autonomie al è interessant e di scandaiâ. Ancje se o pensi che al à di restâ il fat di jessi dentri di un sisteme plui grant.
In tancj, chi di nô, si insumiin un stampon catalan, pal Friûl.
Ma jo no fevelarès di model di espuartâ chi di nô. La autonomie e à di nassi in maniere spontanie e e à sens se al è un coinvolziment di un grant numar di personis. E alore al pues jessi un valôr par il teritori.
Lui fevelial par furlan?
Sì, ancje se no benissim. Di frut lu fevelavi di plui, po dopo lu ai un pôc pierdût, zirant pe Italie. No soi un espert e no rivarès a sostignî un discors lunc cence colâ in cualchi italianisim.
Ce rapuarts aial cu l’Udin di vuê?
L’Udin al è la mê scuadre. Li o ai zuiât, alenât. No ‘nt pari altris. O ai rapuarts soredut cui zuiadôrs Handanovic e Di Natale. Cu la societât, in passât o ai vût cualchi divergjence, ma superade. Vuê i rapuarts a son otims, no mi à mai fat mancjâ un puest in tribune e se o vevi cualchi esigjence particolâr mi è simpri vignude incuintri. Nuie ce lamentâsi.
E cui tifôs?
Ju considerin tra i plui educâts e pacifics dal Campionât. E duncje a mertin di jessi tratâts ben. Come dutis lis personis che a van al stadi e a àn un compuartament coret.
Cemût si podaressial definî il leam tra la scuadre e il so teritori?
L’Udin al è rapresentatîf di dut un teritori, di dut il Friûl storic: di fat ancje a Gurize a son clubs e tifôs che a van al stadi. L’Udin al è alc che “no si discut”. Int braurose dai sucès che soredut tai ultins agns a son stâts tirâts sù.
Al è un alc che ju da dongje in bloc tor de lôr scuadre. Un câs diviers che in altris regjons, dulà che i tifôs si sparnicin fra plui societâts di balon. Chi al è propit un atacament.
O vin tantissims clubs ancje ator pal mont. Une mape complete publicate sul sît udineseclub.net ju mostre a Cipro, in Israêl, in Canadà. No isal forsit che cheste scuadre e rapresenti une tiere, un popul?
Ma, jo lu cjati un discors avonde leât ae cuistion de emigrazion. In Australie o ai cjatât ancje altris clubs di tifôs, par esempli de triestine. Il furlan al à in plui i “Fogolârs” e il fat di dâsi dongje par viodi une partide di balon al è un fatôr di agregazion fuart e di identitât. Alore, mi sint ancjemò plui furlan, tignint pe Udinese.
Aial nostalgjie dal cjamp di zûc?
O ai abdicât tant che alenadôr plui di cuindis agns fa!
Isal plui divertent alenâ o contâ il balon par television?
Al è plui rilassant e facil fâ il coment tecnic de partide. Seguî une scuadre sul cjamp di zûc, direzile, al da plui sodisfazion, ma la component dal stress e je plui alte. Plui divertente la television, che e da mancul sodisfazions ma almancul un al è plui seren intant che si gjolt la partide.
Cuant che al comentave dal stadi Friûl al à vût dongje Giorgia Bortolossi e po Francesca Spangaro. Cui jerie la plui brave?
Ah, no! No fâs classifichis. Jo o doi i vôts ai zuiadôrs, o scrîf lis mês pagjelis dome su chescj. E su nissun altri. Ma i garantìs che a son dutis dôs cetant bravis e preparadis. ■
OSCAR PUNTEL