RICUART. Cungjò dotôr Sergio Cadorini

Joibe ai 19 di Avrîl al è mancjât Sergio Cadorini, miedi, conseîr dal PCI tal Comun di Udin e de Regjon Friûl-VJ.
Al jere nassût a Triest tal 1929 intune famee di çampe impegnade in politiche; so pari Adalgiso al rapresentave il Partît di Azion intal CLN di Triest e daspò al è stât sindacalist de UIL. Sô mari e je stade la prime segretarie de FGCI di Triest.
Cui agns ’50 al frecuente il pediatre e inteletuâl triestin Bruno Pincherle, prime cu la Unitât Popolâr di Parri e daspò intal Partît Socialist di Unitât Proletarie (PSIUP) e al tache a impegnâsi ad implen in politiche, fin a candidâsi ae Cjamare.
Student a Padue, al jere a stâ te cjase dal student ancje cui triestins slovens e di in chê volte al à tacât a preseâ la lenghe e la culture slovene.
Tal 1962 al veve cjatât puest tal ospedâl di Palme e intal 1975 al devente primari di pediatrie a Glemone. Dal 1985 al 1995 al devente conseîr dal PCI tal Comun di Udin po, par une legjislature, in regjon, a Triest.
IMPEGN PE TUTELE DAL FURLAN_ Om di grandis cualitâts umanis e professionâls al veve madressût ancje une particolâr sensibilitât pe presince des minorancis dal nestri teritori. Al fo difat un dai prins coseîrs a ocupâsi dai zingars, a volê che la comunitât slovene de province di Udin e vignìs ricognossude e valorizade e, tant che prin firmatari, al presentà in regjon une propueste di leç a pro de lenghe furlane che, adun cun chê presentade di Sergio Cecotti, e formà la struture de leç regjonâl 25 di Març dal 1996, n.15 pe tutele e la promozion de lenghe e de culture furlane e pe istituzion dal servizi pes lenghis regjonâls e minoritariis.
LENGHE FURLANE TAL OSPEDÂL_ Tant che miedi tal ospedâl di Palme al veve capît la impuartance di lassâ fevelâ par furlan i gjenitôrs dai fruts malâts. Cussì un pôc par volte al veve imparât a capî il furlan ancje lui. A Glemone, soredut partecipant a lis assembleis des tendopolis, là che la int e discuteve di dut par furlan, al capî che pardabon il furlan al jere une lenghe juste par ducj i contescj.
Lis ideis inovativis che al à metût in vore te sô esperience di primariât di pediatrie di Glemone a àn puartât a la nassite dal dipartiment materno-infantîl, che al zontave pediatrie, gjinecologjie e ostetricie intun complès ugnul. Al veve la idee che si scugnive deistituzionalizâ e decentrâ la assistence. La pediatrie e veve di vê ambulatoris intes vilis dulintor, dulà che a levin regolârs i miedis plui voltis par setemane. Chest al permeteve ancje une fuarte ativitât di prevenzion. Il taramot dal 1976 al è stât la ocasion juste par meti in vore dutis lis sôs ideis.
IMPEGN CULTURÂL_ Tant che om di culture al à ancje lavorât come gjornalist de cjarte stampade fasint lis cronachis di balon dal Udin par L’Unità e scrivint recensions di concierts e mostris e fondant cun Zorç Ferigo e altris la riviste “Il vicino è vicino” e fasint di diretôr responsabil.
Par Radio RAI  al curà une trasmission dal titul “Un pediatra sulla porta di casa”.
Tai ultins agns di ativitât al à insegnât tant che incjariât inte facoltât di Medisine di Triest e, lât in pension, si è metût a studiâ sloven.
PROGJETS DI REALIZÂ_ Mi somee just ricuardâ doi siei progjets che nol è rivât a puartâ a bon fin e che al sarès impuartant ripiâ parvie che a son di grande atualitât: par Udin al voleve fâ de viere SAFAU un centri culturâl polifunzionâl e al veve prontât un test par une leç regjonâl pes bibliotechis. A bastarès dome cjatâ la volontât politiche par puartâju indenant.
Cungjò Sergio ■
Silvana Schiavi Fachin/ Silvana Spajota dai Sclâs