TERITORI. La Rêt come “gnove Vicinie”

La gnove “vicinie”? E pues jessi la Rêt. Se i nestri vons a decidevin ce che al coventave pe lôr comunitât cjatantsi fisicamentri inte place dal paîs sot dal tei, «ancje cumò nus coventarès un lûc, fisic o virtuâl, par cognossi ducj i aspiets des sieltis che a rivuardin il nestri teritori. E mi smaravei che une Regjon come la nestre – dulà che il taramot al à sburtât a une grande partecipazion inte gjestion de evoluzion urbanistiche – no vedi ancjemò istituzionalizât un puest dulà che i citadins a puedin dâ la lor opinion su temis come lis grandis infrastruturis e lis trasformazions dal contest cuotidian di vite dai lor paîs».
Fabbro al è un espert di chê che in dì di vuê si clame “planificazion partecipade”, ven a stâi chê maniere di rindi protagoniscj i citadins des grandis sieltis che ju rivuardin. La uniche soluzion par evitâ che sindrome Nimby (“Not in my back yard”, “No tal gno zardin”) che e puarte cun se protestis e contrascj di bande des popolazions dai teritoris interessâts di oparis dal grant impat. «Al è clâr che la partecipazion e à di jessi sigurade pardabon, e no jessi un fat retoric dulà che si presente sieltis caladis di parsore su la int come bombis in timp di vuere». «Dome cjatant moments di confront seris e dant dutis lis informazions in maniere clare e trasparente si pues fâ capî che une opare e je stade pensade tal interès de int e no dome pal tornecont di cualchidun» al dîs Fabbro «ma par imbastî un imprest decisionâl seri bisugne che chest al sedi indipendent, che il so parê al conti e che al vedi dutis lis informazions par creâsi une idee e cjapâ une decision».
In presince di organisims dal gjenar eletrodots, rigassificadôrs, autostradis e feradis, discjariis e implants di produzion energjetiche varessino vite plui facile? «Se si vûl decidi parsore dal cjâf de int, no si à mai vite facile. La condivision e jude a cjatâ soluzions, magari difarentis e cun coscj plui alts pal Stât o pal imprenditôr, ma cun plui acet de bande de int». «La presince di internet e permet vuê une difusion capilâr de informazion e lis istituzions a àn dut il vantaç a stiçâ la discussion, no dome su grandis oparis ma ancje su piçulis modifichis ai Plans Regoladôrs che vuê invezit in maniere burocratiche a restin dentri dai scansei dai Uficis Tecnics dai Comuns. E po a son ancje lis destinazions des casermis che a son la ereditât plui evidente des servitûts militârs che a àn paralizât par 50 agns il nestri cunfin. Parcè no interessâ la int dal lôr destin?»
Lis prioritâts pal guvier de urbanistiche dut câs a son ancje chês che a passin par sieltis dificilis ma necessaris “come chê di fermâ l’ûs ecessîf di teritori”. No si pues lâ indevant a jemplâ di ciment e asfalt i nestris paîs sedi pal dissest idrogjeologjic che al derive di chest abûs, ma ancje parcè che plui cjasis vueidis a son, mancul a valin chês de int che invezit e je a stâ alì. Ma chi a son doi ostacui: prin di dut l’egoisim e l’individualisim de int e dai impresaris ma ancje «il fat che la costruzion e je viodude dai Comuns come un imprest par fâ casse e tirâ sù beçs: e fin cuant che cun Imu e Bucalossi a vuadagnaran dome i Comuns che a lassin costruî, ancje se in maniere salvadie, al sarà ben dificil ridusi il consum di teritori». ■
Walter Tomada