VIERTIDURE. La vôs di “In uaite”

La vôs dal Coordenament dai paîs taramotâts, ma ancje par diviers dopo che il moviment si jere sfantât, e jere “In uaite”, mensîl che dal 1977 al 1993 al à contât in direte la vite tes tendopolis, tes barachis, diret di Mauro Tosoni.
Cemût isal nassût “In uaite”?
«Si tratave di organizâ la comunicazion e la informazion dentri dal Coordenament e duncje la prime funzion dal gjornâl e je stade chê di “boletin des ativitâts”. Po dopo e je vignude ancje la fase de “cuintrinformazion” par vie che la stampe taliane/talianote e cirive di dâ une informazion “cloroformizade” cuant che invezit i problemis a restavin.».
Cemût jerial organizât?
«Si lu distribuive cuntune “difusion militante”, barache par barache. I prins numars a vevin une tiradure di 5.000 copiis e cul timp o vin rivât a vê ancje sui 900 abonaments, ancje se il gjornâl no si lu cjatave in edicule. A lis riunions a partecipavin cirche 30 personis che a vignivin un pôc di dut il Friûl: de Cjargne, de Colinâr, dal Friûl ocidentâl…».
Ce rapuart veviso cu lis istituzions?
«Ancje di critiche fuarte, par esempli la stesse gjestion “Zamberletti” no nus plaseve par vie che e jere masse centralistiche, cuant che par noaltris invezit al jere fondamentâl restâ suntun model plui “locâl”. Ma ancje se no sparagnavin nuie a nissun, o vin vûts ricognossiments che no si spietavin: par esempli, il stes president Comelli al è rivât a definî il nestri gjornâl “il sâl de democrazie”».
Ce evoluzion ise stade dopo de ricostruzion?
«Tal ultin “In uaite” e jere deventade la vôs dai moviments popolârs che a operavin sul teritori e duncje a partecipavin ambientaliscj, i grups che a contestavin lis servitûts militârs o la dighe di Pinçan».
Ce restial di chê esperience?
«Une maniere di fâ gjornalisim che a partìs dal bas, dulà che la protagoniste e je prin di dut e di ducj la int. La voie di fâ informazion critiche. La cussience che il popul al pues fâsi un gjornâl. Infin ancje la sodisfazion di cjatâ int che a distance di agns e ricognòs il nestri servizi a pro de comunitât». ■
Christian Romanini