Sfuei Mensîl Furlan Indipendent
Archivi de Patrie

ATUALITÂT – Archeologjie ancje pai fruts

............

Cui che al studie archeologjie lu sa ben: cjatâ un lavôr dopo de lauree al è un grum dificil; la situazion par cheste categorie di lavoradôrs e di ricercjadôrs no je des plui facilis chi in Italie, che invezit e varès di jessi la scune ideâl par professionalitâts di cheste fate. No je ancjemò une liste dai archeolics, scuasit simpri a lavorin in condizions di precarietât, sotpaiâts e cence normis di sigurece. Magari cussì no, il grant sburt al reste principalmentri la passion pe storie de nestre tiere, la emozion de scuvierte des nestris lidrîs e la voie di fâ cognossi lis testemoneancis dal passât.
E cussì dôs zovinis archeolighis furlanis (Venusia Dominici di Çuian di Puçui e Francesca Ciroi di Gonars) a àn decidût di pandi cheste lôr cognossince ancje ai plui piçui.
A VORE SUI SGJÂFS_ Si partìs duncje cuntune spiegazion des tecnichis e dai struments doprâts dai archeolics, par passâ ae cognossince de pratiche dal mosaic e de piture parietâl; po dopo si tache cul sgjâf vêr e propi, dulà che i fruts a sperimentaran la emozion di une scuvierte archeologjiche tirant fûr i “reperts”. Ae fin ducj insiemit si dedicaran ae pulizie, ae catalogazion, al disen e aes fotografiis di ce che al è stât cjatât.
La idee e je partide l’Istât passât, cuant che Francesca e à proponût intal comun di Gonars une ativitât estive pai fruts de scuele primarie; il program si disvilupave dilunc di une setemane e al cjapave dentri une part teoriche introdutive e la part plui divertente, ven a stâi il sgjâf simulât sul teren. Il lavôr al è stât preseât, sedi dai fruts sedi dal Comun che al à declarât che al tornarà a ativâlu l’an cu ven.
UN PROGJET ITINERANT_ Dopo di cheste esperience, lis dôs laureadis in Conservazion dai Bens Culturâi e cumò laureandis inte specialistiche in archeologjie li de Universitât dal Friûl, a àn decidût di metisi insiemit par disvilupâ un program di lavôr coordenât. “La idee e sarès chê di puartâ il progjetut ator pes scuelis e intai Comuns” – nus conte Venusia – “di mût di organizâ laboratoris didatics dulà che i fruts a podedin jentrâ intal mont de storie e de archeologjie in maniere divertente e costrutive. Par chest, noaltris o stin cirint di pandi il progjet e di fâlu cognossi ator, lant di persone a proponilu intai comuns e intes scuelis, mostrant lis nestris referencis e la nestre voie di fâ! O vin ancje stampât volantins simpatics dulà che i interessâts a podin subit viodi il program cu lis ativitâts e lis lezions”.
Ma altri pont particolâr di cheste iniziative al è che è je davuelzude sedi par talian sedi par furlan, par rispuindi ancje ae richieste di didatiche in marilenghe, daûr de Leç 482/99.
Duncje, il fin ultin al è chel di fâ in mût che i fruts a partecipin ad in plen ae esperience de riscuvierte dal passât e soredut de storie dal nestri teritori.
Dree Venier

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +