MEDITANTLIS TAL SO CÛR. Il meracul dal www

Une des emozions plui bielis de mê vite e che ancjemò mi mene maravee e ven de prime volte che o soi lât in tren. Mi ricuardi ancjemò: o jeri sentât intun scompartiment di len li che e jere la targute “Posto riservato agli invalidi di guerra e del lavoro”, o vevi i bregonuts curts e lis gjambutis a pendolon e o cjalavi fûr dal finestrin; dut tun moment, partît il tren, mi pareve che jo o jeri fer intant che i pâi de lûs a cjaminavin e daspò a corevin. No capivi… o jeri fûr di me.
No propit cussì ma un alc dal gjenar mi è sucedût intal Dicembar passât cuant che cirint il www.glesiefurlane.org e clicant il tasselut “Messalin Festîf” mi si son presentadis lis preieris e lis lezions de Messe de Prime domenie di Avent. O cjalavi e o pensavi: Cemût? Il Messâl roman par furlan al è dismenteât intun scafal a Rome e jo lu ai dut sflandorôs culì di me!
E dopo o ai dit: Benedet XVI al è come cuant che si parave dentri lis gjalins intal gjalinâr: intant che tu lis sovavis di une bande ti scjampavin di chê altre.
Il Messâl roman par furlan al è tra di nô. Nol à il timbro, ma nol impuarte. No pensi che la Madone e vedi vût dibisugne di un cartelin par preâ inte sinagoghe.
Seont me, a esistin trê manieris di preâ. La prime e je la plui semplice e la plui naturâl; nus e insegne Crist li che al dîs: “Tu invezit, cuant che tu âs voie di preâ, jentre te tô cjamarute e, sierade la puarte, pree il Pari che al sta tal segret; e il Pari to, che al viôt tal segret, ti ricompensarà” (Mt 6,6).
La seconde e je cuant che midiant de Bibie si metìn in compagnie dai profetis, dai sapients, dai tribulâts de storie di Israêl e cu la lôr peraule i cjacarìn al Signôr.
La tierce e je chê de liturgjie: la plui dificile par tancj motîfs, ma che però nus ten lontans di devozions sbaliadis e nus fâs presint il misteri de nassite, de vite, de Pasche e de glorie dal Nazaren.
Il Messalin Furlan nus jude a unî chescj trê moments di preiere parcè che al jentre inte nestre cjase e vite, nus presente lis lezions de Bibie e nus da il just savôr dal an liturgjic. Al è une grande ocasion di spiritualitât.
O lei inte presentazion dal “Messâl furlan pes domeniis e pes fiestis” tradusût di pre Checo Placerean e stampât intal 1977, che bons. Battisti, vuê vescul emerit e in chê volte vescul de diocesi di Udin, inte presentazion al scriveve:
“O olsìn sperâ, tal rispiet des disposizions de Mari Glesie che (chest messalut) al puedi deventâ il “catechisim” pes nestris plêfs e pes nestris fameis, tun moment come chel di cumò, che al pratint di puartâ la religjon tal cûr dal nestri popul”.
Nô o domandìn e o sperìn tant di plui: che il nestri www al sedi une ocasion par unîsi in preiere tra di nô, un jutori pes liturgjiis cun predi o cence predi, un spieli dal pecjât dal podê pe conversion de glesie.
E cumò o torni a cuant che di frut i pâi de lûs a corevin e il tren al jere fer: vuê, e di une vite in ca, no crôt plui a chest. Invezit o crôt che vuê midiant dal www il tren de spiritualitât in Friûl al cori di galop intant che i pâi di Rome a restin fers.
E alore, benvignût www.glesiefurlane.org  > Messalin Festîf! Jo, clicant, mi impensarai di voaltris e cun voaltris o prearai; voaltris cirît di fâ bielavuâl cun me.
pre Tonin Cjapielâr