ATUALITÂT – Cjant Patriarcjin

Un studi puartât indevant par agns, che al veve ancje vude une prime e dizion tal 1978-79 e che dopo 30 agns al torne a jessi publicât par cure di pre Josef Cjargnel, che al veve racuelt i materiâl pe prime edizion: chest al è “Cjant patriarcjin de tradizion orâl” finît di stampâ tal Dicembar dal 2007, salvant de dismentie un patrimoni inestimabil come il repertori musicâl de liturgjiis che al fonde lis lidrîs tal rît patriarcjin.
Une opare che e segne un passaç fondamentâl te storie musicâl e no dome dal recupar des fonts, soredut pes dificoltâts che, an dopo an, a cressin simpri di plui. Come che al conferme pre Josef te introduzion “Indagâ sui fats de antighe Aquilee nol è facil, stant che la damnatio memoriae decretade de storiografie uficiâl su lis liendis dal Patriarcjât, dopo de Sisme dai Trê Cjapitui, e à netât vie ducj i documents in merit, mostrant la sô viamence distrutive fin sui rescj dal nestri Rît Patriarcjin, ai timps dal Concili di Trent e, come che o savìn, ancje in fuarce de cariche cuintririformiste dal vescul di Milan, Carli Borromeo”.
La opare dopo une prime part che e introdûs lis motivazions e il percors di pre Josef, sclarint la origjin di chest recupar tacât cun sistematicitât tai prins agns Setante, al passe a trê cjapitui li che a son dividûts i cjants cjapâts sù: i cjants tradizionâi in lenghe latine, i cjants tradizionâi in lenghe ladino-furlane e lis trasliterazions dal latin in lenghe ladino-furlane.
Si à duncje une tripartizion dai spartîts musicâi che e je seguide di une impuartante part bibliografiche che e siere la publicazion.
Christian Romanini