LA FABRICHE DAI… LIBRIS. Universalitât te particolaritât di Riedo Pup

In ocasion di inovâi al è dificil ricuardâ cui che nol è plui cence lassâsi cjapâ la man in celebrazions che a colin te retoriche. E tal câs di Riedo Pup al sarès il piês dai dispiets che si podarès fâi a la sô memorie. Par chest no scrivarìn di trop grant che al jere chest mestri. E o doprìn “mestri” parcè che nus somee il tiermin plui adat par un om che nol veve sielte dome la profession di insegnant, ma traviers dal so impegn civîl al à savût descrivi il Friûl e Furlans te maniere plui furlane che si podeve imagjinâ: Par un pêl, Diu nus vuardi, Magari ancje, Si fâs par mût di dî, Bot e sclop… pagjinis dutis di gjoldi e rumiâlis.
Plui di un e di doi a àn vût dit che la narative di Riedo Pup e sarès degne dal miôr premi di leterature taliane: po ben, no sin dacuardi cun cheste definizion, no parcè che no sin dacuardi su lis cualitâts dal Pup, anzit!
Sut e sclet come che al jere lui, ancje la sô scriture e jere essenziâl, popolâr, tal sens plui alt dal tiermin. E propit ta chest so jessi furlan in maniere cussì profonde al à savût dâ dignitât no dome a la lenghe, ma al popul stes che al jere protagonist des sôs pagjinis, proietant cheste particolaritât tune dimension universâl. Cussì ogni paragon gjeografic, temporâl, culturâl al risulte ridutîf. Riedo Pup al à fat un grant regâl al Friûl parcè che nol à tradide la sô lenghe, corint daûr a chês sirenis che masse dispès a frein chei “inteletuâi” che a preferissin “l’Arno al Tiliment”.
Ma no je dome une cuistion di lenghe, parcè che midiant dal mieç Pup al à celebrade la anime, il jessi di une civiltât che tai siei scrits si esaltave restant peade a chel mont contadin cussì cjâr al Nestri e che i veve fat di scune.
E se ancje chel mont vuê al è simpri plui un ricuart smavît tai voi di cui che lu à vivût, cun Pup al è deventât une epiche popolâr che e manten, ogni volte che tu le tornis a lei, chê frescjece de leterature di gale: grande parcè che e fevele dai piçui. ■
Christian Romanini