EDITORIÂL. Simpri plui, simpri miôr… Di bessôi

Pal amôr di Diu, benvignude fieste e ricorence, magari la ore che e fos simpri plui grande e cun tante int, ma nol è plui pussibil che si fermi a une zornade la nestre afermazion di un Friûl difarent, libar e autonom. Cjapaitlu tant che un sbroc, denant di chel che al sta lant indenant sul Friûl.
Viodêt par esempli i risultâts de ricercje metude adun dal Osservatori socioreligiôs dal Trivenit, partint propit di cheste ultime definizion. “Trivenit” apont, intun messedot di int, lenghis, storiis, paîs e sensibilitâts diviersis di Vignesie a Bolzan, di Triest a Udin. E se nol è Trivenit, e devente “Religjositât in cambiament a Nord est”, ma tal cjalderon e je la stesse mignestre. E cussì, ancje la Glesie e torne indaûr, se mai e je lade indenant, su la cuestion furlane. La ereditât di Aquilee, tant sberlade a peraulis, e divente dome une biel sproc di doprâ cuant che al covente. Si torne a fevelâ di Vignesie dulà che il Patriarcje al somee simpri di plui al Dôs che al guvierne sui teritoris de Serenissime.
Domandâsi ce che al sucêt ai cristians al è une vore impuartant, soredut apont in Friûl dulà che i predis a àn tignude simpri alte la bataie autonomiste, ma la stesse identitât furlane e je stade miscliçade al cristianisim. Cemût alore ise pussibile une riflession se tu sês omologât a cualchidun diviers di te?
E di bande laiche no lin miôr, nancje sui livei di une pussibil organizazion aministrative, divierse di cheste Regjon mâl nassude e bastarde.
Dut il dibatiment roman su la cuestion des provinciis e jere forsit la ocasion par tornâ a meti in discussion ancje la nestre forme di guvier. Te stesse assemblee, tignude in Provincie a Udin, al  pareve che alc al podès movisi. Invezit nuie, ancje piês
di nuie: o sin rivâts a la propueste
di “aree vaste”.
Cussì, si cjatìn che cuant che si vierç un pas almancul par meti fûr il cjâf, e je za pronte la manarie par taiâlu.
O lin indenant distès, larìn a fâ fieste pai 3 di Avrîl, a rindi onôr ai nestris amîs de Basse che no molin. Sigûr simpri di plui di podê contâ dome su lis nestris fuarcis. ■
Dree Valcic