INTERVISTE. La Italie no si vise di nô

Cualchi numâr indar o vin sintût sul argoment dal censiment pene fat, une vôs fûr dal coro: chê di Rem Spicemei. Lu vin tornât a sintî par viodi cemut ca je lade a finî.
Si vin sintûts prime dal Censiment. Alore cemût âstu pensât di fâ in proposit?
O ai fat juste cemût che o ai vût fat dîs agns indaûr: i ai mandât indaûr al Sindic lis cjartis che mi son stadis mandadis, compagnadis cu lis motivazions dal câs. Parcè che, come za fa dîs agns, no mi soi sintût rispietât inte mê umanitât, intai miei dirits linguistics, no àn rispietât la mê identitât, la mê dignitât di partignince a une minorance linguistiche che il stes Stât Italie, a reson viodude dome a peraulis, al à decretât di tutelâ (art.3 e 6 de Costituzion, leç 482/99 e des leçs de Regjon Frûl-V.J.).
Pensistu che i sorestantsa vedin capît il sens de tô azion?
Al è avonde clâr che, i sorestants, tant di chenti che forescj, salacor no àn cjapât la cuistion masse a cûr, come che al varès coventât: po stâi o che a fossin stâts indafarâts cun alc che lôr a ritegnin plui impuartant, tant al è vêr che, pal moment, no àn ancjemò cjatât la fate di fâsi vîfs cun cuatri riis. La uniche robe che al à fat il Sindic, che i vevi dât indaûr lis cjartis, e je stade chê di tornâmes a mandâ midiant di dôs fantatis che a son vignudis a cjatâmi e, cun buine gracie, a cirî di convincimi di cjapâlis e di compilâlis come che a jerin. Naturalmentri, cu la gracie che o ai podût, lis ai tornadis a mandâ di là che a jerin vignudis. Ma, une di lôr, prime di lâsint mi à visât che ce che o jeri daûr a fâ al varès podût vê un cost. La mê rispueste, naturâl, e je stade: “al sarâ ce che Diu vorà”.
E la int?
No crôt che e sepi alc de mê resistence, stant che fin cumò il gno rapuart in proposit al è stât dome cul Comun inte persone dal Sindic. A ogni mût, se o calcolìn il colonialisim, ancje linguistic e culturâl, secolâr, che la nestre int e je stade sogjete daspò de ocupazion taliane, no crôt che si spirtarès plui di tant par un che al cîr di no pleâsi a lis prepotencis des istituzions dal Stât. Salacor al sarès alc di disferent dome se cun cheste operazion si les a tocjâur ancje la sachete.
Se il to gjest al fos une semence, cemût varessistu gust che al butàs?
Naturalmentri: o varès une vore di gust di no restâ di bessôl in cheste azion di resistence linguistiche, mi plasarès che mai che un fat, probabilmetri avonde isolât, al deventàs un moviment di une biele sdrume di citadins che a sintin la dibisugne di difindi la lôr identitât linguistiche in maniere legâl e pacjifice e che no vedi pôre ancje di riscjâ un alc par podê rivâ adore di vêle. Cun dut a chel, nol è dit che ancje se un al è di bessôl al vedi di scugnî vê simpri tuart: il dirit nol dipent simpri e dome dal numar, par fortune.
Ce ti spietistu pal prossim censiment?
Stant a ce che ti ai dit fin cumò, tu puedis di bessôl dâti la rispueste: sì, o spieti rispiet pe dignitât mê e dal nestri popul, che al è dibot 150 (1866) agns che o sin tibiâts, par plui fats, dome parcè che si domande di esisti in maniere plene, complete, e no di scugnî resisti in face di dirits che nus vegnin dineâts. Partant, se in chê volte o sarai in stât, mi propon di tignî dûr intal pretindi no la lune ma juste ce che par leç e par nature mi spiete. ■
Mauro Della Schiava