Gurize. Bale tal zei, zuiadôrs ator

Intun moment dal gjenar, cuant che lis fabrichis dal mandament a sierin, e partìs la voie di scjampâ di chest nestri Friul. Non ducj a podin vê cheste furtune; par chei che a restin a restin lis iniziativis culturâls dulà passâ cualchi orute, Mittelfest, Folkest, il premi Amidei, organizât dal amì Bepin Longo, tombeur de femme furlan, e di Gigi Pintar, che si cjape cure di ducj i curts, ma di chest o fevelarìn un altre volte.
IL TORNEU ESTÎF_ Oltri ae culture si regjistre une proliferazion di torneus di balon o di bale tal zei, là che magari tu incuintris vecjos amîs che no tu viodis di agns. Gurize e mandament, specialmentri Cormons, e no lu dîs par jessi di part, a son une farie di talents cestistics impresionants, ducj lâts vie de region parcè che no jerin bêçs par vivi di sport. Tonino Zorzi, dit «Il Paron», Pino Brumatti, che nol à nancje mai zuiat une volte ca, Moreno Sfiligoi, furlan di Piedimont, Elvio Pierich, che cumò al vîf a Pordenon, Patrick Nanut, che al è a Fidenza e al è in ativitât. Di Cormons, sietmil abitants, a àn zuiat intes massimis seriis Giovanni «Nane» Grattoni, cjapitani da Reyer Vignesie, Enzino Bigot, fi di Gjovanin che al veve fat la bataie di El Alamein, Cjapitani di Verone, e ancjemò Tavasani, Puiatti, Zorzenon, ducj ex cjapitanis, Castagnaviz, classe 66, che al zuie ancjemò par cualchi carantan in Toscane. Al è propit il «Gnaviz» che o ai viodût al memoriâl «Krainer» di Gurize, torneu estîf un grum famôs, e, fevelant cun lui, mi son vignûts tal cjâf ducj chescj nons di personis che no son rivâts a fâ fortune a cjase lôr e a àn vût di scjampâ di altris bandis.
RECORD IN A_ La robe impressionante e je che la Regjon Friûl-Vignesie Julie e à vût il record di vê dutis cuatri lis provinciis in serie A, Pagnossin Gurize, Hurlingam Trieste, Mobian Udine, Postalmobili Pordenone, e dutis e cuatri lis scuadris a spindevin bêçs par comprâ int di altris bandis cence pensâ ai zuiadôrs autoctons. «A Gurize no son mai bêçs», mi à confidât Enzino Bigot a Pascute su la mont Quirine, «par chest mi è tocjat di lâ vie. O jerin talmentri fuarts culì che cun doi amerecans di chei bogns o podevin fâ une serie A trancuile, e invezit no. In font o sin emigrants ancje noaltris, e in font, a cuarantesîs agns, o soi ancjemò a lavorâ a Cremone e no ca a cjase».
ATOR PE ITALIE_ Nane Grattoni, cuant che il comun i à dât il premi ae cariere al à dit che «e je ore che si sês visâts di me, che a son vincj agns che o puarti ator il nom de nestre citât pe Italie». In efiets al è un pôc cussì, dut chel che al ven di fûr, par noaltris, al à un savôr difarent de robe nestre, plui bon, cuissà parcè? John Puiatti, che al à molât la cariere par slargjâ la sô aziende di vin, al è un dai pôcs che al è tornât, ma cuant che si à un toc di tiere forsit al è diferent. Oltri al «Tocai» si varès di difindi ancje il «Talent», in cualsisei cjamp, e nol è stat cussì fin cumò. Finint cul Gnaviz Castagnaviz, «viodìn se o cumbini vîf cuntune compagnie di assigurazion a Florence, a cjase no savarès ce fâ, no cognòs plui scuasit nissun».
Max Deliso
_______________________________________________
Ikea furlane Gurize?
Lunis ai 16 di Lui il consei comunâl Vilès al à fat bon il progjet dal prin lot dal Parc comerciâl Ikea – la inomenade dite di aredaments svedese –, «un risultâts che ducj noaltris o spietavin dal 1999», al à marcât il sindic Simonetta Vecchi. Po dopo vie pe setemane il sindic al à vût dit che il Parc comerciâl «al costituirà une straordenarie oportunitât» no dome par Vilès e pe provincie di Gurize, ma par dute la regjon. Doi i motîfs: «Il prin leât ae ocupazion che, e garantirà dut câs plui oportunitâts ae fassis di lavoradôrs plui debui, come par esempli lis feminis». «Il secont al è che al rapresentarà una grande ocasion pal turisim: in tancj a rivaran des regjons dongje». Une considerazion che e à vût l’acuardi dal president de provincie Gherghetta, che si è impegnât par che i lavôrs di ristemazion dal racuardi di Vilès-Gurize a tachedin il prime pussibil.
Globâi, glocâi e cocâi
La Ikea e je une di chês ditis multinazionâls e globâls che a son stadis acusadis di jessi omologants: i lôr mobii – di bon design e bas cost – a son compagns par dut il mont. Insome, si riscje di cjatâ il stes aredament in tune une cjase a Milan come che a Vilès. Si à di dî però che la Ikea e fâs ancje cualchi iniziative par vignî a contat cul teritori li che al è un so negozi. Par esempli in Catalogne i librets di istruzion pal montaç dai mobiii a son ancje par catalan. Si rivaraial a vêju ancje par furlan? I nestris politics si sarano preocupâts di chest, o nome di vê «une grande ocasion pal turisim»? Solite storie: ai forescj, ai turiscj, ai furlans ce Friûl e ce teritori i contìno?
Redazion