ATUALITÂT – Little Italy… ma Grant Friûl

Lauree honoris causa a Mario Collavino di Muris di Ruvign

1776 pîts de Freedom Tower (la Tor de Libertât), 1776 l’an de Indipendence dai Stâts Unîts e 1077 l’an di fondazion de Patrie dal Friûl. Ce leam àno chescj trê numars? Un leam fuart tant che il ciment armât che il siôr Mario Collavino e i siei colaboradôrs a àn impastât par tirâ sù la gnove tor simbul dai Stâts Unîts braurôs de lôr fuarce economiche, politiche e culturâl sul terorisim e su la asse.
Mario Collavino, furlan di Muris di Ruvigne emigrât in Canadà tai agns ’50, si pues ben definî “il furlan fûr dal Friûl plui nomenât – e a buine reson – dal 2011”, ancje se Oscar Puntel al veve za intervistât Mario su “La Patrie dal Friul” tal Avost dal 2009. E, a distance di doi agns juscj di chê interviste, Collavino chest an al à donât ae sô comunitât une grande statue dedicade al emigrant che e je stade poiade su la mont di Ruvigne. Al è stât  protagonist de convention dal Ente Friuli nel Mondo a Spilimberc; in Otubar, la Famee Furlane di New York i à dedicade une serade di onôr e di ricognossince li che al à partecipât ancje il President de nestre Regjon Renzo Tondo. E, simpri il mês passât, la Universitât dal Friûl e à dât a Mario la lauree honoris causa par «i nivei di ecelence li che al è rivât tal cjamp de inzegnarie civîl». Sincere in maniere esemplâr e je stade la lectio magistralis dal “laureant inzegnîr” Collavino che al à viert il so discors cussì: «Bundì a ducj e gracie di vê volût partecipâ a cheste prestigjose cerimonie e di onorâmi cu la vuestre presince.

A mi plasarès fevelâus par furlan – e cheste istituzion universitarie mi permetarès ancje di fâlu – ma par rispiet di chei che no lu cognossin o continuarai par italian». Une storie contemporanie di sacrifici, intuizion, lavôr, coraç e cumò di meretade visibilitât pal om di Muris che cui siei fradis e cui siei fîs al à mostrade la grandece dal Friûl laboriôs – cheste volte sì, cence retoriche –.
E cumò, in ocasion de scree uficiâl de tor, sperìn di viodi in bande de bandiere americane chê vivarose dal Friûl ancje parcè che Mario al à prometût te lectio ce che nus veve za dit te interviste dal 2009, ven a stâi che su la tor plui alte di New York e di dute la Americhe si viodarà la bandiere dal Friûl. E sarès une grande ocasion di visibilitât pes dôs acuilis leadis di chel ’77, date iniziâl di une grande storie, e di tantis similitudins, a partî de misturance di popui e di lenghis che a àn costituît e alimentât i doi popui.
Dôs bandieris par diferenziâsi di chê che no je une misturance ma un sbrudiot, chê “Little Italy” simbul stereotipât di une Italie fate di “mafia, pizza e mandolino”. Sperìn che la inaugurazion de Freedon Tower e deventi une ocasion furlane, un ocasion par mostrâ al Mont ce che o sin, ce che o volìn e ce che o sin bogns di fâ.
Daniele Martina