Sfuei Mensîl Furlan Indipendent
Archivi de Patrie

CUINTRISTORIE DAL NÛFCENT 1990-2000. Si siere il Nûfcent, tra dirits e violencis

............

L’ultin deceni al è un spieli trement dal Secul curt
Al è il 1990 cuant che il judiç di Vignesie Felice Casson al vierç une inchieste suntune operazion che i servizis segrets talians, il cjacarât SISMI, al veve inmaneât par parâ l’imperialisim dai Stâts Unîts cuintri il nemì comunist orientâl, che al cucave propit di là dal confin che il Friûl des casermis al veve di vuardeâ, come un cjan mastin peat ae lôr cjadene. A vegnin fûr armis platadis sot dai tets des malghis in Cjargne, une rêt che e varès vût di deventâ operative se mai la “rabie dai sclâfs” e ves tentât di procedi ae invasion. Cussì, o vin scuvierzût la esistence di Gladio, de operazion “Stay Behind”, ven a stâi “reste scuindût”, e ce che o vevin viodût dome tai film americans di spionaç lu vin cjatât platât tai toblâts, tes stalis, tes baitis des nestris monts, o vie pai boscs dal confin orientâl dal Stât. E se no fos stade tremende la violence di stragjis come chê di Petean, inmaneade propite di cheste rêt, i gladiatôrs nus saressin semeâts plui che altri nostalgjics patetics di un mont autoritari e militarizât, la plui part vecjos cu la panzute, che tal lôr deliri a zuiavin a fâ i 007 nostrans. E cualchidun di lôr al è ancje stât om di partît, ben  inserît te vite sociâl dai nestris paîs. Cussì, cuant che ai 25 di Jugn dal 1991 la Republiche Socialiste di Slovenie e declare la sô indipendence de Jugoslavie, scjadenant une vuere di dîs dîs sul confin, il senari al somee pardabon inverâsi. Invezit, al è dome il principi di une tragjedie umanitarie, oltri che gjeopolitiche e sociâl, che nus varès tirâts dentri in plen. Lis sclopetadis e i muarts su lis stradis de Rozna Dolina, a pôcs metris di nô, i cjars armâts dai serps propite su la linie dal confin di Gurize e i lôr migs che a svolavin, a son stâts dome il principi di une matetât che e à inflamât ducj i Balcans, puartant tai nestris paîs profugancis e disperazions. E se tal 1992 il Pape polac al ven a fâ visite ae nestre Tiere, al dimostre une volte di plui che il Vescul di Rome nol rive a comprendi la complicade intersezion dal magjisteri di Aquilee, e – daûr di chê baraonde di lusôrs e di cjants e di chê costose e inutile machine organizade par lui des Curiis regjonâls, cetant lontane de semplicitât evangjeliche di un pastôr pelegrin – nol jes fûr nuie, nancje une vôs, par judâ la tragjedie sclave che si stave consumant su teritoris che di gran timp a jerin sot la vuide dal Patriarcjât. Anzit, benedisint la gnove Republiche indipendente de Cravuazie (no stin a dismenteâsi che il Vatican al è stât il prin a fâlu), al da un implicit benstâ aes copariis dai Serps, che i catolicissims oms di Zagabrie a fasin tes Krajnis, ae perifarie di Zare, obleant fameis di feminis, vecjos e fruts a scjampâ vie su cjars e tratôrs par salvâsi la vite, intant che lis lôr cjasis e glesiis (clarementri ortodossis) a brusin.
SI DISTAPONE LA PIGNATE DE CORUZION_Ma ben une altre dramatiche burascjade si stave ingrumant par ribaltâ, par fortune almancul cence sanc, ancje cjase nestre. Lis indagjins inmaniadis dal grup di judiçs di Milan su la coruzion de Politiche taliane (a passaran ae Storie cul non di “Mani Pulite”) a dislidrisin ancje tai nestris conseis comunâi e regjonâls plui di cualchidun convertît ae religjon dal “si cumbine”, cussì lontane di chê dignitât di servizi che i nestris vons nus vevin insegnât a rispietâ. Aministradôrs piçui e grancj a vegnin arestâts e processâts. Eclatant, tal 1993, l’impresonament di Adriano Biasutti, che si fâs cinc setemanis di preson e po dopo il fer domiciliâr, cul patizament, ae fin dal procès, di trê agns e doi mês par bustutis peadis soredut ae costruzion de sede de Amga. Democristian doc, om di grant podê, plui voltis definît a nivel nazionâl il Ministri dal Forest dal Nordest, chel che al veve in pratiche inventade la Agemont, la aree produtive di Damâr, il concet di “Regjon Puint” orientade sul as Barcelone-Kiev, al cole come tancj di lôr su la smanie di pensâ che dut al sedi pussibil e permetût cuant che tu as vût il mandât dal Popul. Une manfrine ripetude masse dispès ancje in dì di vuê, par cuvierzi o piês par justificâ intrics e robariis. Forsit la bisugne di lavâsi chestis mans, e cun lôr ancje la muse, e à però judât il popul furlan, come che simpri al è sucedût te storie, a cjatâ fûr une gnove reson di orgoi e di limpidece. Un sburt a fâ miôr, tornant a partî propit des lidrîs, là che la anime de plante e je simpri plui sclete.
LA LEÇ REGJONÂL PAL FURLAN_ Il 1996 al segne cussì la impuartantissime leç regjonâl numar 15, là che pe prime volte e ven sancide une norme di tutele dal patrimoni linguistic e culturâl dal popul furlan. Al è li che al nas l’Osservatori pe Lenghe Furlane (OLF), che tal 2004 si evolvarà inte Agjenzie Regjonâl pe Lenghe Furlane (ARLeF). Une leç che e varès vût di judâ scuelis, comuns, radios e televisions a promovi une programazion in lenghe, dal rest come che la Costituzion e predicjave bielzà tal articul doi, là che si dîs che a son ricognossûts “i dirits inviolabii dal om, come la apartignince a une comunitât che si fonde su la sô lenghe tant che massime espression di se”. Il Stât talian al spietarà la fin dal deceni, dal secul e ancje dal mileni, ven a stâi il 1999, par fâ proprie la stesse filosofie cu la leç 482. In Municipi a Udin, ai 29 di Novembar dal 1998, cun passe 60% dai vôts al jentre il furlanist Sergio Cecotti, za president de Regjon. Al vuide une zonte componude de Leghe Nord e dôs listis civichis.
BOMBARDAMENTS DI LÀ DAL CLAP_
E intant che la comission e lavorave par fâ votâ la leç in Parlament, di Davian si alçavin i F16 americans e talians. Che il Siôr D’Alema al veve firmât l’intervent armât cuintri la Serbie di Milosevic, tradint ancjemò une volte il test te Costituzion che e repudie la vuere tant che risoluzion di ogni contese. Speravino forsit che cualchi bombe e podès colâ ancje su la comission legjislative pe lenghe furlane? Une robe e je sigure: il Friûl ancjemò une volte al ven cjolt pal cûl, trasformât intune puarteavions militâr. Une base par fâ valê la vôs dal imperialisim e de vuere. Lis bombis a colarin su lis fabrichis e sui operaris, sui cuartîrs là che e viveve la int normâl, su lis feroviis, su lis radios, su lis televisions e ancje su lis scuelis. “Dams colaterâi”. Su lis bancjis no. Chês a vevin di coventâ ae fin de vuere par garantî i bêçs de ricostruzion.
Angelo Floramo
____________________________________________
RIBALTONS FIN SUL ULTIN
Il secul al finìs sdrumât intun ribalton mostri, che al messede in dîs agns il piês che la Storie di Europe e vedi mai pandût: il Nûfcent, violent e selerât, si siere di fat jenfri une codebuie di vueris, coruzion, stragjis, savoltaments che nissun al varès mai podût pensâ, ni proviodi. E dut al passe come simpri pai trois de nestre Patrie, intune specie di sintesi di sanc e di pôris, cuasi che e fos la sigle conclusive, o la note bibliografiche o plui semplicementri l’epitafi tombâl di cent agns tacâts cul bot e finîts cu lis luminariis dai bombardaments su Belgrât. E dut chest no dome visibil de nestre Tiere ma adiriture interçât cu la nestre specialitât milenarie di osservatori privilegjât, o miôr ancjemò di cjalderie inflamade di dut ce che al passe vie pe Europe e pal Mont. Mai come tai ultins dîs agns de ete contemporanie, il Friûl al devente un laboratori di trasformazions politichis, sociâls e culturâls che come furlans nus à viodûts coinvolts in prime file, dal moment che par gjeografie o par vocazion, par destin o par maledete mission, o sin simpri stâts il baricentri dai aveniments plui impuartants de storie. Un lûc là che la biografie ocidentâl si misclice cun chê dal Orient, ancje se di soreplui la storiografie uficiâl e fas fente di no savêlu e no lu conte. Ve ce che al è stât chi di nô chest periodi che al jere il famôs “secul curt”, come che lu veve ben definît il storic inglês Eric I. Hobsbawm, disvelant une volte di plui ce che al profetave te sô Cuintristorie l’ingjustri profetic di pre Bebo Marchet, ven a stâi che la Storie scrite di chei altris nus à simpri viodûts tant che espression di dut fûr che di ce che o sin stâts pardabon. Forsit par chest nol è un câs che tal mieç di une gjostre tant mate si fâs sintî ancjemò plui fuarte la vôs e la esigjence di une identitât che e domande, che e rivendiche, che e pratint di pandi la sô specialitât ancje a nivel legjislatîf, anticipant sieltis che il stât talian al varès fatis une vore plui tart, cence mai impegnâsi pardabon par aplicâlis.
Angelo Floramo

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +