CULTURE – IL FRIÛL TAL ETERE. La tele di Istât

Cuant che si impie la television, fra il cjalt dal Istât e il no savê ce fâ, al cjape un sintiment di disperazion. Il timp di chê stagjon “in onde” si implene di “vueit”. Al mancje di une prospetive e di une sô lidrîs di contignûts. Ce barbe vê a ce fâ cun replichis, televenditis e teleimbonitôrs, telefilms americans dai agns Otante, e altris stupidets. Paraltri,  si capìs: al è il timp des vacancis e gjornaliscj, operadôrs, autôrs – esistino inmò? – a varan ancje i lôr dirits. Al moment, duncje, ancje lis nestris amiralis, lis televisions plui pandudis – Telefriuli e Free – a àn fermât dutis lis lôr produzions, che no sedin chês informativis. E dut câs, a “kilometri zero” ancje lôr: i tg a continuin a lâ indenant pe lôr strade, ma a rancs ridots, cun mancul servizis in esterne – lis troupes no si movin che no sedin muarts o fats di croniche impuartants – e si regjistre un increment al ricors di imagjins di repertori e di intervents al telefon di ospits, in direte o no. Cuant che al va ben, l’ospit al è invidât in sede e la interviste e à tant che sfont i cuadris o i esternis de redazion.
La sfide che lis emitentis a varan di chi al inizi de gnove stagjon e sarà chê di miorâ e di potenziâ il segnâl digjitâl. In ciertis zonis di mont, chês plui periferichis, Tf al è sparît dopo dal switch off, si ben che e sedi la tele plui pandude in FV-J. Free e à une cuvierzidure a maglis di leopart, ma a son plui chei che no le viodin che chei che le viodin. La triestine TeleQuattro (e à la redazion furlane a Udin, a Palaç Antivari) no si capìs invezit dulà che si rive a viodi, di ca dal Timâf.
Che la polse, di nô sbeleade, e puarti almancul cualchi soflade di novitât tai palinsescj de prossime Sierade, che su di lôr no si sa ancjemò nuie. Cualchidun al varès bisugne di une indreçade. Cjapait “Free”, che e samee simpri plui a maç e bandon. Tai ultins trê mês, la tv di Panto – che si jere vendude tant che la gnove tv dal Friûl e dai furlans – e je lade daûr di une vere e proprie “triestinizazion” dai contignûts. Il talk di atualitât “Sottosopra”, a un ciert pont si è dedicât dome ae citât alabardade, ai candidâts sindics e ai “Bandelli boys”, cussì come che il talk dal prin dopomisdì “Meridiana” al veve lis “mulis di Parenzo” ae conduzion. Alore, a chest pont, che no le clamin plui “Free tv”, ma “Free – TS”.
REDAZION