CULTURE – ¡Arbeit Garbeit!

Ju àn definîts musiciscj agricoltôrs, strumentiscj acrobatis, cove di teroriscj sonôrs. Lôr a son la male jerbe che e mene ancje dulà che no tu vuelis, infestants, no confuartants, resistents aes classificazions. Lôr a son i «Arbe Garbe»: cjapâ o molâ. Tal lôr ultin lavôr «¡Arbeit Garbeit!», al punk rock si zontin sonoritâts plui metalichis e dissonantis, free jazz e musiche cjantautoriâl, il dut triturât insiemit a plasê e cence visâ. Intune cite sureâl al cise un plevan che si maride, che al à un fi e che al vîf jenfri i puars, la cagnetât de croniche cence pudôr di gjornâi e televisions che a vendin vitis par doi francs, e inmò la maturie dentri e fûr del manicomi, cuntun regâl a Artaud. Ma no stait a vê pôre, in chest disc no cjatarês proclamis: «No stait a cjapânus masse sul seri. Noaltris no vin ciertecis. Dut chest al è dome un grant zûc».
Un sberlef, a partî dal titul (un non sense) e de cuviertine (cinc cjavrons, a firme dal grant dissegnadôr serp Aleksandar Zograf). Il dut intun viaç inzirlôs de valadis dal Nadison fin aes calles di Buenos Aires, contât di mil colôrs linguistics: talian, spagnûl, sloven e furlan. Ma atents, i «Arbe Garbe» a son alergjics aes “apartignincis”. Conseâts a cui che no i plâsin lis barieris, di nissune sorte. Nomats dal biel principi: sedis agns di convivence musicâl, une vincjine di musiciscj che si son dâts la volte e siet discs publicâts. «La sfide e je stade lavorâ pal grup plui che pai singui, intune costante dimension di laboratori, fasint sorevivi il spirit». E di fat le male jerbe e je vive e sane: la formazion corint di cinc elements e je plui produtive e sperimentâl di simpri: «Al è timp di molâ lis lidrîs e pandi lis alis, di zuiâ decostruint al plui i gjenars e i confins». «¡Arbeit Garbeit!» e il lavôr prin «The great prova», a son stâts dome une cerce. Par savê dulà che a vuelin svolâ cheste volte, si pues cucâ te mont verde di Frisanc: tal Mushroom Studio a son za daûr a meti sù un gnûf disc.
Natascia Gargano