CULTURE – CUSINE. Masse cjalt par gustâ? e jo mi sbrochi a gulizion…

Al è rivât il cjalt, e cualchi zornade si fâs pardabon fature a parâ jù il gustâ di misdì cuant che il soreli al pete e l’aiar al scjafoie, cussì la sielte e cole massime su robe frede e lizere, tant che lis salatis.
Al vignarès di dî “bon pe linie” ma la cuestion no je cussì semplice, parcè che – massime par chei che a fasin lavôrs di fadie o pai fruts che a stan cressint – nol è facil sostentâsi dut il dì cuntun pomidoro e dôs fueis di lidric, e nol è nancje tant judiziôs rivâ a la ore di cene cuntune fam di lôf, parcè no je mai une buine idee lâ tal jet cu la panze sglonfe.
Cussì, mai come di Istât, al salte fûr che la miôr ocasion par fâ scorte di “benzine” pal cuarp e je la prime gulizion, un past simpri masse trascurât, che par solit si sbologne cuntun cafè e une brioche parâts jù di corse, cuant che invezit al sarès propit il moment di tirâ dongje lis energjiis par dute la zornade.
Lu savevin ben i nestris nonos che prime di lâ tai cjamps a fasevin une gulizion sostanziose (cun pan, spongje, marmelade e lat, o magari cuntun plat di ’zûf di lat e polente, o parfin cuntune scudiele di cereâi cul lat, chel che cumò a vendin tant che une robe “moderne” cul non di “muesli”); e invezit a misdì a gustavin tai cjamps cun robe semplice tant che pan e formadi e pomis.
No che il cjalt, dut câs, al ledi masse dacuardi cuntune scudiele di cafelat cui biscots, che e je la abitudin plui popolâr di chestis bandis par chei che a fasin di solit gulizion. E alore forsit al vâl la pene di doprâ un cimi di fantasie e cualchi ingredient sempliç, par inventâsi une gulizion difarent, che e sedi sostanziose ma ancje sauride e golose. Lis pussibilitâts a son tantis…
____________________________________________
Mai pensât di fâ gulizion cussì?
CEREÂI (muesli, flocs di blave, forment sglonfât e vie indenant: tes buteghis lis varietâts a son tantis, ancje biologjichis o messedadis cun pomis secjis, cun freulis o cjocolate). Par solit si mangjin te scudiele cul lat, ma al va benon ancje il yogurt (cun chel di pomis si pues ancje cambiâ savôr ogni dì).
PAN, SPONGJE E MARMELADE al è un classic, ma mai banâl, parcè cuntune marmelade di chês fatis in cjase, e pan e spongje bogns, il risultât al pues jessi miôr di cualsisei dolç. E se invezit de tace di lat si sielç un sûc di pomis, si pues zuiâ cun l’imbinament dai savôrs (provâ, magari, une marmelade di narant o di limon cu la spremude di narant fresc, o une marmelade dolce tant che chê di freulis cuntun sûc un tic amâr tant che chel di pompelm…).
UNE BIELE “CRÊPE” e je propit une buine maniere di scomençâ la zornade, e si pues preparâ lis fertaiutis intun sôl colp par plui zornadis. Baste messedâ 130 gr. di farine cuntun ûf, un piç di sâl, e zontâ 2 dl di lat. Intune fersoriute antiaderente, dislidi un groput di spongje cence scjaldâle masse, e po dopo zontâle tal impast. Cuntun sfuei di scottex slargjâ la spongje che e reste te pignate, di mût di cusinâ lis fertaiutis cence fâlis tacâ. Cuntune dose cussì, par une fersorie di 20 cm, si rive a vê 8-10 crêpes che si puedin tignî par plui dîs tal frigorifar, intune scjatule sierade. Se si doplee le dose, a ‘nd è avonde par vê crepês par une famee di trê personis pratichementri par dute le setemane. Di cuinçâ (dopo velis scjaldadis par pôcs seconts) cun marmelade, creme di cjocolate, pomis secjis, caramel, “dulce de leche” (la creme di lat e zucar argjentine che si spalme e che e sa di “caramele mou”), cun pomis frescjis (freulis, pomulutis di bosc, bananis…) e sbrume montade, e vie indenant.
UNE ALTERNATIVE AES “CRÊPES” A SON I “PANCAKES” americans (125 gr di farine, 2 ûfs, 185 cl di lat e une prese di bicarbonât, di frulâ insieme e di cusinâ te fersorie cuntune cocule di spongje). In chest câs, miôr fatis sul moment, ma al è un lavôr di cinc minûts. I americans lis mangjin cul sirop di aiar ma e va ben ancje la marmelade, e benon la mîl.
Un vêr plasê al pues jessi chel di tacâ la zornade cuntun BIEL FRULÂT che si prepare in doi minûts e che al rive a meti insieme un grant numar di savôrs e di sostancis. Si partìs simpri dal lat, e si zonte dut ce che us ven tal cjâf: une banane, freulis, meluç, cafè, une sedon di cacau, yogurt o sbrume se si lu vûl plui penç, ma ancje un pâr di biscots (di chei ai cereâi o cu lis gotis di cjocolate), o parfin un ûf, par chei che a àn voie di tirâsi sù ben ben. In pratiche, un past complet di parâ jù intun sôl colp…
Pai plui aventurôs, e je simpri valide la variante salade, tant che si use tal nord di Europe. In Istât forsit i classics “ÛFS CUL BACON” a son un tic masse ma cualchi fetute di persut cuet o di formadi fresc (ancje il bon vecjo toast) a puedin jessi une opzion, massime se si sa che a misdì no si varà timp di gustâ. O magari cualchi fetute di pan neri, spalmât di spongje e cun parsore une stricute sutîl di renghe fumade e, par fâ il dut plui lizêr, une biele tace di spremude di narant.
Margherita Timeus