ATUALITÂT – Sagre dal Patriarcjât a Aquilee cun doi ospits speciâi

Come ogni an si cjatarìn te nestre Basiliche Mari par onorâ i Sants Ermacure e Furtunât
Glesie Furlane e La Patrie dal Friûl, cu la colaborazion de Agjenzie Regjonâl pe Lenghe Furlane, a clamin adun i Furlans in ocasion de Fieste dai Sants Patrons dal Friûl, Ermacure, prin Vescul di Aquilee, e Fortunât, so diacun.
L’apontament al è come ogni an a Aquilee, te Basiliche Mari, domenie ai 17 di Lui aes 6 di sere, la prime domenie dopo de zornade juste che e colarès la fieste (i Ss Ermacure e Furtunât, di fat, a son segnâts sul lunari ai 12 di Lui).
Al celebrarà bons. Basili Danelon, vicjari gjenerâl di Concuardie e Pordenon, adun cui predis di Glesie Furlane. Pe ocasion si ricuardaran pre Checo Placerean e pre Antoni Beline, tradutôrs de Bibie, che chest an e je stade protagoniste dal grant event de leture continuade scomençade ai 3 e finide ai 9 di Avrîl.
Cun di plui chest an la zornade si cjame di un gust particolâr ancje par vie di doi ospits speciâi che a insioraran l’incuintri.
Prin al sarà Gabriele Pelizzari, autôr dal libri “Il Pastore ad Aquileia”, opare monumentâl che e presente une aprofondide leture dai mosaics. L’autôr, cun inizi aes 5 dopomisdì, al compagnarà la visite dai paviments de basiliche, fasintnus cognossi i contignûts dai siei studis.
Il secont ospit al sarà il coro “Vôs di Vilegnove” che al compagnarà la messe e che chest an al à a pene cjantât a Rome, puartant la lenghe furlane dentri de Basiliche di Sant Pieri.
Finide la messe si cjatarìn ducj alì dal ristorant “Ai Patriarchi” par continuâ la fieste.
Redazion