IL SIVILOT. Simpri plui lontans de int

Che al sofli un tic di aiar sui politics mi somee avonde clâr. A fasin vignî i sgrisui ae int, no dome i lôr stipendis, ma soredut la lôr arogance. Un esempli ultin: inte presentazion in place dal Udin, a cjacaravin ancje lôr, i politics, e che no fos zornade lu si è capît adore cuant che sul palc al è rivat il president Tondo: dut un mugugnâ de int, ma lis siviladis a jerin pocjis. Si podarès definîlu un malstâ viers la politiche in gjenerâl. Di sigûr al è ancje di dî che uns doi agns indaûr, cun dute probabilitât nol sarès sucedût, ma i timps a gambiin e cussì ancje il sintî dal popul. Dut câs, invezit di fâ fente di nuie, Tondo al à volût fâ il bulo, vignint fûr cu la jessude «No mi fasês pôre» che, cheste sì, e à tirât dongje une sivilade grandone.
Plui svelts di lui Virgili e Honsell: il prin, assessôr de Provincie al è partît subit cjantant “Alè Udin” cjapant di cuintripît la int, il secont parcè che, subit dopo lis primis siviladis, al à fevelât dal gnûf stadi, finint in “Glorie”.
Ma miôr di ducj, il “Nobel de campagne eletorâl”, al stât è Antonione che, tai ultins seconts pe pussibile alleance cun Bandelli, viodût che i mancjave ancjemò la firme de Flame tricolôr sul acuardi, al scjampave come un jeur par Cavana, par no fâsi becâ dai giornaliscj.
I nestris sorestants, dut câs, al somee che no nasin tant la situazion, a continuin pe lôr strade: une promesse daûr di chê altre, ma intant il Friûl al reste indaûr.
L’OM DI BURI