FURLANS, DIGJITAIT FURLAN – Vichipedie: pont de situazion

La Vichipedie o, par dîle par inglês, Wikipedia, e je une enciclopedie libare fate dai utents. Al è un dai prins esemplis e probabilmentri chel plui cognossûts di intelegjence colaborative, ven a stâi fâ sù alc cu la colaborazion di plui cjâfs, cence basâsi dome sul lavôr di un grup plui o mancul sierâts di esperts. Chest al permet di meti dongje plui ideis e ognidun al pues corezi i erôrs che al cjate; cu lis discussions, si rive ancje a vê une version il plui pussibil neutrâl. Al è clâr che come sorzint di informazion e va doprade cuntun tic di bon sens, verificant simpri in altris puescj ce che al è scrit. Purpûr il sucès de idee al è dimostrât dal fat che e je daspò stade aplicade ai cjamps plui diviers, des mapis a la musiche.
2005: E NAS LA VERSION FURLANE_ Se al inizi la Vichipedie e jere dome par inglês, planc plancut a son nassudis tantis altris edizions in dutis lis lenghis tabaiadis vie pal mont. Tal 2005 e nassè ancje chê par furlan, cu la colaborazion di un pâr di volontaris.
LA SITUAZION _ Ma cemût sino metûts a sîs agns di distance? La situazion no je tant biele, parcè che la cressite de edizion furlane e je za di un pôc ferme. Un dai problemis principâls al è che la percentuâl di utents che a son bogns e a àn voie di scrivi par furlan no je tant alte. Po par scrivi o voltâ robis di altris lenghis al covente timp e no ducj a ‘nd àn; la Vichipedie no je tant visibile: cuant che o cirìn alc par talian suntun motôr di ricercje, a vegnin fûr la edizion par talian, a voltis chê par inglês, scuasit mai chê furlane. E, par ultin, ma no mancul impuartant, no si à rivât a creâ une comunitât daûr de Vichipedie, che e podedi par esempli concentrâsi su cierts argoments, fâsi publicitât o ancje dome cjatâsi par fevelâ. Al è ancje di dî che in Rêt il furlan nol è tant grant, par chest voie o no, il target al è limitât. Il probleme numeric al è impuartant parcè che a la base de Vichipedie e je propite la idee de interazion tra int divierse: no par nuie la Wikipedia par inglês e je la plui complete e afidabile, parcè che e à une vore di utents e di divignincis diviersis. E duncje si torne al classic probleme dal gjat che si muart la code: plui robis a son, plui la int lis lei e i ven voie di dâ une man, aumentant cualitât e cuantitât.
CEMÛT JUDÂ LA VICHIPEDIE_ E sì che par scrivi alc, no si scuen fâ tantis robis: si pues cjatâ la pagjine suntun argoment che nus interesse, o sul nestri paîs, e fracâ su “Cambie”, o se no esist, creâ une di zero. E se no si sa ce scrivi, si pues cjapâ la vôs intun altre lenghe (la sielte no mancje, si va dal cinês al breton) e voltâle par furlan. Po se un si regjistre, al pues ancje tignî cont di ce che al scrîf, vê une pagjine personâl e discuti miôr cun chei altris utents. Se un al scrîf ben e al à voie di corezi lis vôs di chei altris, al pues deventâ aministradôr, che nol è il paron de Vichipedie, ma dome un utent che al pues par esempli eliminâ lis vôs dome di reclam o che no rispietin i criteris di base de Wikipedia, ogni tant clamâts i cinc pilastris: zontâ dome contignûts enciclopedics, rispietâ il pont di viodude neutrâl, rispietâ il copyright, vê simpri rispiet par chei altris e no vê masse pôre di fâ cambiaments, parcè che al è facil tornâ indaûr [http://bit.ly/kZT5BY].
E tu, ce spietistu par dâ une man?
Andrea Decorte