CULTURE – AGRICOLTURE. Mai, mês dai sparcs!

Cheste stagjon e je par solit chê dai sparcs: ormai ducj o savìn che il mês di Mai al è il moment miôr par cjapâ sù e mangjâ i sparcs.
Nô chi in Friûl o vin une varietât speciâl di sparcs, chei blancs.
I sparcs dal Friûl, par cuintri rispiet a ducj chei altris che a son verts, a son blancs. Cemût sucedial che i sparcs furlans a son blancs?
Al è avonde facil rispuindi a cheste domande: in Friûl i sparcs a vegnin tirâts sù in maniere particolâr: di fat i contadins – ma no dome lôr, tant al è vêr che a son tantis lis fameis che ju fasin vignî sù intal ort di cjase – a taponin lis plantutis cu la tiere, par fâ in maniere che lis plantis di sparcs no vedin lûs par che no si colorin. Fasint cussì, si rive a fâ deventâ il sparc blanc e a fâi cjapâ un savôr mancul fuart e un tichinin plui delicât di chel vert.
Il sparc al è forsit la verdure plui coltivade inte nestre regjon: i plui grancj produtôrs di sparcs si cjatin inte zone di Tavagnà, Tresesin e inte Basse Furlane.
No bisugne di fat dismenteâsi che inte zone di Tisane e di Fossalon di Grau, si cjatin tantis aziendis che a produsin sparcs, un pôc diferents di chei de zone dal Friûl di Mieç ma che la int di vuê a scomence a cognossi e a preseâ.
La Associazion pe Conservazion dal Sparc Blanc Furlan, e à za scomençât il procediment par protezi la Denominazion di Origjin (la Dop), propit par valorizâ e aumentâ la produzion dai sparcs inte nestre regjon.
Bisugne dî che intai ultins agns la produzion e je un pôc in ribàs: di chê altre bande, si pues dî cence nissun probleme che si è cirût di meti tante plui atenzion ae qualitât des produzions, che e je di sigûr une vore alte, come che al conferme ancje l’assessor regjonâl aes risorsis rurâls, agroalimentârs e forestâls Claudio Violino: «No si pues fâ fente di nuie: il sparc furlan, soredut chel blanc, al à di deventâ il vessilifar des nestris produzions di ort, tant che il Formadi Montasio, la trute, il pressut di Sant Denêl e il vin Furlan. O sperin ducj che al rivi a vê il riconossiment de Dop, parcè che o sin denant di un prodot di altissime cualitât, che al è tipic dal Friûl e che, a reson, o podìn clamâlu “tipicamente friulan”».
Cinzia Collini