TERITORIS – AUSTRIE. Il guvier di Viene al à proponût une gnove leç di tutele de lenghe slovene

Il guvier austriac al à anunciât di meti in vore dopo Pasche une gnove leç di tutele de lenghe slovene che e regolarà ancje la mancjante segnaletiche slovene in Carintie garantide dal Tratât internazionâl dal 1955 che al à ristabilît la sovranitât de Austrie dopo la seconde vuere mondiâl e tutele la minorance slovene e cravuate.
Par scjampâ une internazionalizazion de chistion il guvier di Viene al à decidût – finalmentri dopo 56 agns – di sierâ chest cantìn. La Slovenie e vûl une soluzion bilaterâl, se necessari si podarès ancje rivolzisi a diret ai stâts signataris dal Tratât p.e. la Russie.
Tal Otubar 2010 a tachin lis tratativis tra il governadôr carintian Dörfler, lis organizazions dai slovens cun a cjâf il ambassadôr Inzko e il rapresentant dal guvier Ostermayer. Ostermayer al à cirît a cjatâ un consens ancje a nivel locâl cui sindics e ancje cu lis organizazions todeschis nazioniâls tant che la Leghe dai difensôrs (Abwehrkämpferbund) par sbassâ il pericul di tensions tra la popolazion locâl.

Propueste di leç: segnalazion bilengâl tes comunis cuntune popolazion slovene sore di 17,5% e un aument dai mieçs finaziaris
Tal 8. di Avrîl Ostermayer e Dörfler a àn presentât intune conference stampe la gnove propueste di leç che e proviôt la segnalazion bilengâl tes comunis cuntune popolazion slovene sore di 17,5%, difat un risultât aritmetic tra il stât presint 25% e 10% domandât de Cort Costituzionâl, in numars 165 cartei bilengâi.
Tant che segn di buine volontât si vûl ufrî ai slovens un aument dai mieçs finanziaris pe scuele medie di musiche slovene (www.glasbenasola.at) e lis scuelis maternis slovenis, in plui si promet di rispietâ ancje l’ûs de lenghe slovene uficiâl intes comunis bilengâls.
La reazion dal Consei sloven la plui grande organizazion e jere negative, anzit si fevelave di pressions e di une campagne tes mediis cul fin di fâ acetâ cheste soluzion, lis altris dôs plui piçulis organizazions slovenis però a vuelin acetâ chest compromès storic.
Inzko president dal Consei sloven e ambassadôr de Republiche Austrie in Slovenie al à spiegât a zornaliscj in diviers emissions cun grant interès mediâl che cheste propueste e je nassude za mês indaûr cence i rapresentants slovens, il numar cumò presentât 17,5% al sedi un pactum tra il guvier di Viene e il governadôr carintian Dörfler.
Grant interès mediâl
Inte emission politiche »Im Zentrum« dal ORF  Inzko al cirive denant des telecamaris parâ sù il numar dai cartei, il governadôr carintian Dörfler lu pare indaûr cu lis peraulis »no si cjatìn tal Marcjât di Tarvis a contratâ«.  Tes mediis i comentaris politics a domandin di sierâ chest problem, se necessari, ancje cence il consens dal Consei dai slovens, vonde il Sì des dôs plui piçulis organizazions slovenis.

Il probleme de segnaletiche bilengâl tal centri de visite dal president austriac Fischer in Slovenie.
Dopo il No dal Consei sloven il ministri sloven Žbogar plui cuiet: „impuartant che si cjate une soluzion che e ven acetât ancje de minorance”. Agjitâts invezit i politics de oposizion che a fevelavin di un ricat e di fuartis pressions dal guvier austriac. Par discuti il probleme il president sloven Türk al à invitât tal 19. Avrîl il so coleghe austriac Fischer. Secont Türk al bisugnarès rispietâ il Tratât di stât, la Slovenie e podedi acetâ dome une soluzion in consens cun dutis lis trê organizazions slovenis.
Divide et impera
I slovens carintians no jerin simpri unîts, cumò lis dôs piçulis la aleance slovene ZSO e la Comunitât SKS Skupnost a son pront a acetâ al contrari cu la plui grande il Consei sloven.
Tant che in altris paîs p.e. in Slovachie o Romanie dulà che la minorance ongjare si è dividût in doi, simpri cul solit concet diestre-sinistre, minorancis piçulis a pierdin tai zûcs daûr il principi antîc »divide et impera«. In Carintie la division dentri de minorance e je leade cu la storie dal paîs, la ideologjie nazionâl todescje e cirive di dividiju in chei fedêi costruint un popul artificiâl todesc-sloven i »Windisch« e in chei no-fedêi al stât austriac ven a dî i slovens
Se il Tratât al fos rispietât in base ai dâts statistics dai agns Cincuante, cuant che al fo firmât, si varès di meti sù plui di 800 cent cartei bilengâi, daûr la statistiche dal 1991 e 2001 però “dome” 273 (numar proponût dal Consei sloven). Vuê dopo agns di assimilazion il guvier al ufre la soluzion di compromès cun 165 cartei.
JANEZ ERAT