ATUALITÂT – L’avignî dal Friûl autonim al è tes mans dai Furlans

I moviments autonomistics in Friûl a cjalin prin di dut al passât, ae storie. Cence lâ plui indaûr, a àn ben presint il Stât patriarcjâl di Aquilee. Il patriarcje al viodeve dal guvier dal Stât. Cjalait lis “Constitutiones Patriae Forijuli”, vêr e propit monument al dirit furlan, promulgât dal Tresinte di Marquart di Randek.
Il patriarcje al jere assistût dal Parlament, chel plui antîc di Europe, là che a jerin rapresentâts ducj i rancs sociâi. La “Patrie dal Friûl” si à viodude ricognossude di Vignesie une autonomie relative; di fat, ancje se al jere stât riformat il dirit locâl, si conservavin varis istitûts medievâi.
Vuê nô o cjalìn soredut al presint: o cjalìn al federalisim. Di plui: nô o cjalìn ae autonomie speciâl o particolâr, che e je ricognossude a Regjons periferichis tant che la nestre, che a presentin problemis e esigjencis propriis, nassudis di resons storichis o gjeografichis o etnichis o linguistichis. Par chest, la lôr autonomie e je plui acentuade e, par cualchi materie tant che chê des minorancis linguistichis,
di risiervade competence.
CENTRALISIM TRIESTIN_ La Regjon e je stade concepide a Rome prin di dut – se no in maniere esclusive – in funzion di Triest che e bisugnave tignî ancorât ae Italie cuintri lis manovris jugoslavis. Il Friûl al è stât cussì ancjemò une volte sacrificât. Udin al è al centri di dute la Regjon. Cuintri ogni logjiche e cul motîf de italianitât di difindi, dut il podê al è stât colocât de citât destinade a capitâl: dal Consei regjonâl ae Zonte ai Assessorâts (mancul doi), e ancje dutis lis direzions dai uficis statâi. La veretât e je che cheste Regjon e je stade metude in pîts cun criteris centralistics, a imagjin e someance dai ministeris romans. L’aparât burocratic al passe aromai i trê mil dipendents. Triest, di no crodi, al è ancje capitâl di une Provincie, cun cinc piçui Comuns slovens brincâts sul Cjars. Ancjemò vuê, Triest al è une vore atîf tal domandâ intervents dal guvier.
Al jere cuintri il centralisim roman che e veve di nassi la riforme regjonâl. Risultât? Vuê o vin, di là di chel roman, il centralisim triestin.
I NESTRIS “PARIS”_ Nô o sin duncje la continuazion ideâl dai moviments autonomistics di Tessitori, di Schiavi, ma o sin un moviment di opinion, che no si trasformarà mai intun partît: alore si clame Comitât pe autonomie e il rilanç dal Friûl. Che si è costituît intal Novembar dal 2005, al à assumût in curt une posizion di prin plan pes numerosis e buinis iniziativis promovudis, cjapant dentri rapresentancis istituzionâls, i partîts, lis fuarcis sociâls, la Glesie. E je nassude la Assemblee costituente dal Friûl, e je stade la difese e la valorizazion de lenghe furlane specie intes scuelis, la firme dal pat pe Universitât. Impegn particolâr e à domandât la promozion de Assemblee des Provinciis furlanis, pont fondamentâl dal program dal Comitât. Il fin di cheste Assemblee al è chel di unî lis fuarcis inte individuazion dai problemis concrets di interès comun, e di risolviju otignint i mieçs adats de Regjon: prin di ducj il miorament des arteriis za statâls e cumò regjonâls, di decenis in spiete, tant che la Pordenon-Udin-Gurize.
Il Comitât si dopre par che la Assemblee des Provinciis e jentri intun statût regjonâl che al varà di jessi miorât.
BATI I PUGNS_ L’avignî dal Friûl autonom al è intes mans dai furlans. Se i nestris rapresentants politics masse dispès a esitin a batisi cemût che si dêf, a poie di dirits precîs, e se il Friûl al è in posizion subordenade a pet di Triest, al covente che il nestri popul si fasi sintî di plui. “Salt, onest, lavoradôr” al reste un biel laut. Ma si sa che, cui timps che a corin, al cjate scolte dome che cui che al alce la vôs. Al displâs dîlu, ma al è cussì. Bisugne bati i pugns.
Gianfranco D’Aronco, president dal Comitât
pe autonomiis e il rilanç dal Friûl