ATUALITÂT. I Omenuts a rivin al numar cuatri

Al sarà presentât dentri dal mês di Dicembar il cuart dvd dal dissen animât promovût de Societât Filologjiche Furlane daûr di un progjet in colaborazion cu la Agjenzie Regjonâl pe Lenghe Furlane. I Omenuts a son une prime assolude pal nestri marcjât, a vegnin dai Little People de Mattel-Fischer Price e no son mai stâts produsûts par talian. La edizion furlane e je par cure di Massimo Garlatti Costa e Raja Films in colaborazion cu la Arte Video di Palme.
Il mont des ruedis al è il titul dal gnûf dvd che al cjape dentri, come chei altris, cinc episodis di cinc minûts dal un (La gare di Tonin, Miute e la super cope di gjelât, Bete e puarte la pueste, La nâf cu lis ruedis, La sfilade des ruedis). I protagoniscj a son simpri i piçui Bete, Miute, Lole, Pieri e Tunin cu lis vôs furlanis di grancj artiscj tant che Claudia Grimaz, Monica Mosolo, Nicoletta Oscuro, Massimo Somaglino, Alessandro Marini, Francesco Ursella, cu la traduzion e l’adatament di Elisabetta Ursella, la consulence pe lenghe furlane di Christian Romanini, la sincronizazion di Marco D’Agostini, la grafiche di Claudio Zorzenon e la sigle cjantade di Lino Straulino.
“Rivâ al numar cuatri – al spieghe Lorenzo Pelizzo, president de Filologjiche – al dimostre che si trate di un progjet concret e che si intint  da continuitât a di une idee che e je plasude e e à vût cetant sucès tra i fruts e tes scuelis”. Za si pense za al cuint Dvd di realizâ pal 2009.
Propit sul teme des scuelis al è impuartant di rifleti. Omenuts al è un vêr imprest didatic, al insegne il lessic in maniere semplice e sclete e ogni episodi si siere cuntune morâl educative.  Par chest, cu la poie de ARLeF, si proviodarà in curt ae distribuzion dai prins doi dvd intes scuelis de infanzie e dal prin cicli de scuele primarie dal Friûl storic.
Un biel regâl duncje pal Nadâl dal 2008.
Redazion