ATUALITÂT. Un zucar… pardabon dolç

Le marilenghe e pues deventâ il segret dal sucès di un prodot.
I prins a capîlu a colp a son stâts chei dal FAF, i Fantats Furlans.
No crodêso? Chest moviment di zovins pal Friûl, nassût 13 agns fa par tirâ dongje lis gnovis gjenerazion ae lenghe furlane, di un mesut in ca al à inmaneât une iniziative di sucès: il zucar furlan.
IDEE DI SUCÈS_ La idee e je facile e e conferme che la marilenghe e pues jessi armoniose e, massime, une otime propagande. “Di une vore di timp – nus conte Luche Gervasio dal FAF – o vevin capît che lis bustutis di zucar che si cjatin tal bar a son un mieç di comunicazion di no butâ vie. Il bar al è un lûc di agregazion impuartant e, ben o mâl, une bustute di zucar ti capite in man”. Cjatât il supuart, e mancjave però inmò la idee juste. “Une zornade, pensant aes maiutis de Friûlpoint, o vin vude la pensade: parcè no doprâ propit lis frasis e vê lis “nestris” bustutis di zucar?” E je nassude cussì la colaborazion cu la Friûlpoint che e à permetût di doprâ la maiute “Cemût sêstu vuê?” cui dissens di Dree Venier dant il vie a cheste operazion tant golose.
“FUMADIS” INTUN MÊS_ “O vin contatât la dite Scarbolo par fâ un bancâl di cheste bustutis speciâls. E veve di sei dome une robe curiose e particolâr: intun mês, ator no si int cjatave plui nancje une”. Tant par vê une idee dal sucès, al baste pensâ che une bustute e à dentri 5 grams di zucar e che lis scjatulis a jerin 84, par un totâl di 720 chilos! “La robe plui biele e incredibile e je che il FAF al à pensât dome ae idee, la distribuzion e je lade vie pai canâi tradizionâi, permetint aes bustutis di rivâ ancje dulà che par nô al sarès stât impussibil”. Il zucar par furlan al à cussì tocjât i bars di dut il Friûl e si à stramudât intun marimoment in manie ancje pai colezioniscj, stant che a son vincj imagjinis divertentis e diferentis. “Par nô al è stât un grant sucès – nus confesse Luche – ma ancje pe aziende che e je restade une vore contente e che e à domandât di tornâ a fâlis, ma cheste volte dal dut a spesis lôr”. Insome, dopo i adesîf “tirait” e “sburtait”, e il “tapetut par il to maus”, il FAF al à metût a segn un altri sucès, in barbe a cui che al dîs che la marilenghe no jude a vendi.
Tiziano Gualtieri