TERITORIS – INTERNAZIONÂL. Il ritîr dal Dalai Lama

Dopo plui di mieç secul al timon dal guvier tibetan in esili, cumò a 75 agns Tenzin Gyatso, l’atuâl Dalai Lama, al à decidût, mantignint però la sô funzion religjose, di ritirâsi de incarghe politiche «pal ben dal Tibet, parcè che no si à di personalizâ lis funzions» e je stade la motivazion.
Intant in cine e cres la tension: dopo che il zovin munic tibetan Phuntsog, di a pene 21 agns, si è suicidât dantsi fûc tun marcjât e berghelant «Libertât!», in ricuart de rivolte budiste dai 16 di Març dal 2008, la polizie cinese e à circondât il munistîr di Kirti, te provincie sudorientâl dal Sichuan, arestant numerôs religjôs.
LA ACUSE DE CINE_ La decision dal Dalai Lama e à produzûts reazions difarentis: di une bande i guvier dal Tibet in esilii al scugnarà frontâ il delicât procès democratic par cjatâ il sucessôr dal premi Nobel pe Pâs; di chê altre il guvier di Pechin nol à pierdût timp par butâ inmò une volte paltan: «un truc dal trop dal Dalai Lama» e lu àn acusât «di vê progjets oscuris e indipendentistis pe regjon tibetane», invadude di Mao Zedong tal 1951 e di in chê volte sot dal domini comunist.
UN AT DI AMÔR PAL TIBET_ Samdhong Rinpoche, Kalon Tripa (prin ministri) dal guvier tibetan in esili al à comentât «Pechin al cjatarà simpri cualchi acuse o cualchi agjetîf infamant pal Dalai Lama. Cumò a disin che il ritîr dal nestri leader nol è sincîr: a continuaran a fâlu, parcè che no capissin e no àn voie di capî. Il Dalai Lama al à voie di ritirâsi de vite politiche par une motivazion une vore semplice: al sa che la leadership no pues e no à di jessi confinade intune singule persone» e al à sierât disint «Al è un at di amôr un grant segnâl pal mont e pe Cine».
Redazion