VIERZIDURE – I Stâts gjenerâi de culture

Di une robe si à di dâi at a Elio De Anna, assessôr regjonâl a la culture: no i mancjin voie di scoltâ e entusiasim. Ma dopo si à di viodi ce che tal concret al fasarà.
Di fat, dopo dai Stâts gjenerâi pes lenghis minoritariis, consultazions tacadis sintint i referents dai ents che a promovin lis lenghis todescje, po slovene e infin chê furlane, ai 16 di Març, si son tignûts i Stâts gjenerâi de culture. E za si anuncie un tierç event a nivel european.
IN SCOLTE A UDIN_ Tal Auditorium de Regjon a Udin si è davuelt un moment di scolte che al è lât indevant fint passe miezegnot cun decinis e decinis di intervents che l’assessôr al à vût maniere di marcâ come “ecezionâl”. Tancj sugjeriments a son rivâts su la cuistion finanziarie e su la organizazion burocratiche des proceduris: in sostance si domande plui sigurecis e plui risorsis. Dutis (si spere, ndr) lis rispuestis si cjataran tal “Test unic su la Culture” che l’assessôr al à anunciât, cun cualchi anticipazion. Prime tra dutis, lis risorsis pe culture pal 2011 a varan passe un milion di euros di plui rispiet al prin stanziament pal 2010.
POPUL SOGJET E NO OGJET_ Ma in bal, nus pâr, no je dome la cuistion dai finanziaments: di fat, tra i aspiets positîfs e je dal sigûr di meti cheste voie di confrontâsi cul popul, parcè che «Come che nol esist popul cence culture, cussì no esist culture cence popul. […] Il popul al è sogjet culturâl, no ogjet, parcè che al è l’unic a vê une potenzialitât native a produsi culture. Lis struturis, come il mont de scuele o de politiche o de glesie, a àn di partî dal interni dal popul insedantsi dentri come part di un dut, se a vuelin vê zovament e puartâlu. A àn di jessi protagoniscj dentri e insieme cul popul, e no spetadôrs che a constatin o che a comandin» al diseve ancje pre Antoni Beline intun so intervent za tal 1989.
Duncje, ancje pai Stâts gjenerâi e je stade alimentade une vore di aspetativis, ma la sperance e je che dute la int scoltade, no sedi stade iludude (e no sarès la prime volte) dibant.
Redazion