MEDITANTLIS TAL SO CÛR. Il grant Event

A son di ringraziâ prime di dut il President de Provincie di Udin, onorevul Pieri Fontanini e il Diretôr de Agjenzie regjonâl pe lenghe furlane dot. Lorenzo Zanon pe iniziative de leture continuade de Bibie te nestre lenghe: il prin event intal mont li che dute la Bibie e ven proclamade tune lenghe minorizade.
Al displâs che la nestre glesie, ancje se e da une man, e rivi simpri in ritart, e simpri in talian. Chest an al è stât proclamât pe diocesi “l’anno della Parola di Dio” ma tes schedis mandadis jo no ai cjatade olme di identitât di popul, di cussience di liberazion, di peraule furlane. Dut al è tune lenghe foreste e tal intimisim-moralisim  di une glesie disincjarnade.
Pal Event che nus spiete no bastin i 1200 letôrs, ni un centenâr di oris di leture, ni la glesie de Puritât a Udin; cun dut chest e cu la tecniche miôr, l’Event al pues jessi e restâ une sflameade che si distude tun lamp. Di fat se il libri de Bibie al conte la storie di un popul, al à di jessi scoltât e meditât tal nestri contest economic, politic, culturâl e spirtuâl. Ce che la nestre glesie, cun dutis lis sôs schedis, no nus insegne e no nus jude a fâ.
Fûr dal popul, la riflession sore la peraule di Diu e devente alienant o fondamentaliste, ridusude a devozion spirtuâl, racomandade di ducj chei che a comandin fasint la caritât ai puars  ma no tocjant il legalisim injust de struture sociâl.
O pensi che il miôr coment e la miôr preparazion a chest Event e sedi la leture dal libri di pre Antoni Beline «Furtunât il popul che al è il Signôr il so Diu». Un libri improibît tai agns novante cuant che al è jessût, ma ancje l’unic document che fra vicendis di int e peraule di Diu al rive a olmâ une storie sacre che si puedi proclamâ  furlane. In plui al da une dreçade par une leture bibliche che e mene no al cjacarâ erudît dai libris, ma a la madurazion di popul; riflessions unichis di une teologjie de liberazion insedade culì e validis no dome pal Friûl ma par ogni minorance che e ven scjafoiade. Seont me, al varès di jessi metût come libri di test tai studis biblics dal nestri ‘Seminari.
Avôts di lungje vite e di un biel avignî al nestri Event! E cumò o pensi a pre Checo e a ce che al gjoldarès se al fos culì. In sô memorie o conclût chescj pinsîrs cu la preiere dal  grant so amì Martin Lutâr: «Signôr tu tu nus âs dade la tô Peraule e come popul tu nus âs metûts fra chei che ti ricognossin e ti dan laude e onôr. Danus la gracie di tignîle cont, la tô Peraule, e fasile lusî tal nestri cûr par che a florissin in nô tante consolazion e gjonde».
pre Tonin Cjapielâr