Sfuei Mensîl Furlan Indipendent
Archivi de Patrie

SPECIÂL. Storie dal cine furlan

............

Di norme, si fâs partî la nassite dal nestri cine cu la realizazion di Maria Zef di Vittorio Cottafavi. Ma al è di dî che, propite in chê volte (o sin sul imprin dai agns ‘80), za altris a stavin sperimentant films par furlan sei a nivel amatoriâl che professionâl. Cence contâ che la idee di doprâ la lenghe furlane tal cine e nas bielzà tal 1954, cuant che Marcello De Stefano, in chê volte student dal Centro Sperimentale di Rome, al scriveve une senegjature te nestre lenghe suntun episodi de Resistence. E De Stefano, cuntune vision che no si fermave a nivel di un intîf sentimentâl, al pensarà ben, tal 1984, di meti adun un film saç su la figure di Pari Scrosoppi, intitulât Grafiz ‘tun orizont e, doi agns dopo, di dopleâ Controlettura (che e devente cussì Cuintrileture), la trilogjie sul Friûl che e rapresente la part centrâl de sô opare. Cu la idee, par altri declarade, di volê fâ la stesse operazion cun ducj i siei films.
E se De Stefano, regjist professionist, al jere za cognossût al public furlan e no dome, a ‘nd jere altris che a jerin daûr a fâ i prins pas te setime art ma che nissun ancjemò nol cognosseve.
Al è cussì che a tacâ dal 1988, cuant che il CEC di Udin al à pensât di meti adun la Mostre dal Cine Furlan, si son fats indenant, planc a planc, autôrs tant che Lauro Pittini (I varès volût vivi, Prime di sere, Pieri Menis ricuarts di frut), Giancarlo Zannier e Benedetto Parisi, dome par citâ cualchidun.
LA « BUTADE » DAI AGNS ‘90_Ma al è a tacâ de fin dai agns ’90, cuant che si forme une piçule scuadre autoriâl, che il nestri cine al vîf un salt di cualitât. Cussì, dongje di Lauro Pittini, si fasin cognossi autôrs come Carlo Della Vedova (che plui indenant al metarà adun cun Luca Peresson la aromai famose serie Farcadice su la diaspore furlane), Massimo Garlatti-Costa (Buris; Friûl, viaç te Storie), Dorino Minigutti (Intrics, Nûfcent), Remigio Romano (che al invente une gnove forme di comedie) o Lorenzo Bianchini (I dincj de lune, Lidrîs cuadrade di trê) il mestri dal horror di cjase nestre.
Vie pai agns duncje il stîl si sfrancje, dutun cu la tecniche, e la produzion si diversifiche metint dongje a documentaris e films di finzion, lavôrs li che a vegnin sperimentadis gnovis formis stilistichis, come chês metudis adun di Dorino Minigutti, e cualchi bon esempli di animazion (di ricuardâ il videoclip Puar Beppin dal trio Lucia Salmaso, Massimo e Daniele Bocus).
E l’interès al è grant, se si calcole la int che si presente tes salis e soredut il nivel di scolte televisîfs cuant che al ven mandât in onde un film par furlan.
LA MOSTRE DAL CINE FURLAN_Chestis voris a àn simpri vût te Mostre spazi dulà fâsi cognossi dal public, un  festival che al à contribuît – dutun cul Concors par Tescj Cinematografics nassût tal 1996 – ae incressite de nestre 7e art. Un progjet, chel dal CEC, che no si è limitât dome a di une vitrine espositive, ma al à cirût in ducj i mûts di stiçâ ideis e percors gnûfs. Ancje cun propuestis editoriâls (tal 2000 al publicarà “5 senegjaturis” e “Il dizionari dai tiermins cinematografics” e, a tacâ dal 2001, la riviste anuâl di cine “Segnâi di lûs”), cence dismenteâ cualchi impuartante esperience produtive: Vuerîrs de gnot di Christiane Rorato, i films di Bianchini in DVD e cumò la distribuzion dal documentari di Alberto Fasulo Rumore Bianco.
NISSUN SUPUART_ A viodi lis robis cussì si podarès crodi che o sin denant di une cinematografie insaldade. Di fat, se il talent nol mancje, i nestris filmmakers no àn, tant che prudêl, ni un supuart istituzionâl, ni societâts produtivis privadis, ni realtâts distributivis che ur permetin di fâsi preseâ ad in plen dal nestri public. Ancjemò mancul di fâsi cognossi (come che al sucêt inaltrò: Catalogne o Sardegne che e sedi) di un public internazionâl. Ognidun, ben e no mâl e fûr di cualchi sclagn contribût public, al scugne autoprodusi e autodistribuî lis voris che al à pensât e che al met adun cun dute la passion che al à intor. Cu lis dificoltâts che si pues crodi. Dificoltâts che a vegnin palesadis a fuart cuant che si viodin progjets butâts su la cjarte e presentâts al Concors ma che no rivin a cjatâ po lis risultivis par deventâ cine.
Fabian Ros
_____________________________________________
SOT DE LINT
Robin Williams e il cine forest… par furlan!
Al jere un classic tal cine talian : se al capitave cualchi personaç di divignince furlane si lu sintive a fevelâ par “venit” o cul acent venezian. Cence contâ lis cacofoniis linguistichis improbabilis, come chês che si cjatin intun film come Porzûs di Martinelli. Ma dongje, di tant in tant, si cjate cualchi lavôr (pôcs a dî il vêr) li che o vin podût sintî cualchi frase par furlan. Al è il câs di Being Human (Le cinque vite di Hector) di Bill Forsyth (1993) li che, par dut l’episodi ambientât de Ete di Mieç, Anna Galiena e fevele a Robin Williams te nestre lenghe. Plui di resint, in La ragazza del lago, Andrea Molaioli (2006) al fâs dî al nestri Omero Antonutti cualchi frase par furlan. (F. R.)

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +