I claps colâts jù inte strade di Baûs a àn tornât inmò une volte a meti in lûs une des tantis problematichis cjargnelis: chê de viabilitât.
O vin viodût che une strade che e ven sierade – come in chest câs, par cirche un mês – e puarte une serie di consecuencis drastichis no di pôc cont; il trafic al ven zirât viers altris stradis secondariis che il plui des voltis no son adatis a sopuartâ il trafic pesant. Nol è di mancul pês il fat che, te strade che e ven sierade, si regjistre une pierdite economiche pes ativitâts che a stan in pîts cul passaç de int, cence contâ dutis chês altris consecuencis che a colin su pe schene de int che e vîf li e che e scuen fâ i conts cu lis dificoltâts di ogni dì dal vivi in mont. Al è di agns che si cjacare di chest probleme seri, ma se vuê al torne dispès in voghe al è parcè che nol è inmò stât risolt.
Al tocje simpri che al sucedi alc di grues par che ‘cualchidun’ al vierzi i voi e che al cjapi decisions  seriis.
E je vere che tal câs de strade di Baûs o vin podût viodi che la emergjence e je stade risolte in pôc timp, in gracie ancje dal intervent preziôs de Protezion Civîl, des Istituzions che a son intervignudis in timps curts. Nol baste però intervignî tal moment de urgjence, magari cun lavôrs pustiçs, e po dopo sierâ il cantîr.
Al è just bati il fier cumò che al è cjalt, e al è ce che a àn fat i aministradôrs de zone: a àn domandât subit intervents bogns par sistemâ une volte par dutis la viabilitât.
La strade di Davâr e je dome che un spieli, ma al baste zirâ la Cjargne par vê un cuadri de situazion no propit ‘legre’ des stradis: tal cjanâl de But, dilunc la statâl 52 bis, a son stadis butadis jù dôs galariis ma a son inmò tocs strets e pericolôs indulà che il passaç intal stes moment di doi veicui al devente un riscli. Compagn tal passant che di Comelians al mene a Rigulât: in cirche 4 km, a son une cincuantine di curvis pericolosis; no è di miôr la strade Vile-For di Avoltri, une vore batude soredut dai mieçs pesants (al baste dome pensâ ai camions de “Goccia di Carnia” e de Cjartere di Davâr che ogni dì a àn di passâ).
Lis stradis a son tant che lis venis tal cuarp uman: a garantissin il passaç, il colegament, il contat   pe int che e vîf e che e à decidût di restâ, fasint un grum di sacrificis, in mont.
I sorestants, chei che a àn il podê, a varessin di cjapâ a cûr une volte par dutis chest probleme, dant vite a une serie programazions di sistemazion de viabilitât de mont.
E je vere che di cualchi an, in gracie dal Zîr di Italie des bicicletis, cualchi bocon di strade e je stade sistemade e asfaltade, ma la int de Cjargne – par viodi sistemadis lis stradis – ae di sperâ tal passaç di an in an de caravane dal Zîr di Italie?

Marta Vezzi